نگران وزیراعظم کا مسئلہ متنازع بنا تو الیکشن ہی بیٹھ جائے گا،شیخ رشید

عوامی مسلم لیگ کے سربراہ اور سابق وفاقی وزیر داخلہ شیخ رشید کا کہنا ہے کہ  نگران وزیراعظم کا مسئلہ متنازع نہ بنے ورنہ الیکشن ہی بیٹھ جائے گا اور وقت سے پہلے اپنی عزت کھو بیٹھے گا نگران وزیراعظم کے لیے معیشت دان اور سیاست دان میں رسہ کشی شروع ہو چکی ہے۔

اپنے ٹویٹ میں شیخ رشید کا کہنا تھا کہ 20 دن کا سیاسی کھیل تماشہ باقی رہ گیا ہے،جتنے مخالفین کے خلاف کیس بنانے ہیں اور جو بھی قدم اٹھانے ہی اٹھا لیں ہر روز اتوار نہیں ہوتی. پاکستان میں جس کی لاٹھی اُس کی بھنیس ہے،جس دن شہبازشریف پرفردجرم لگنی تھی اسی دن وزیر اعظم بن گئے، آج پندرہ مہینے بعد سارے کیس ختم ہو گئے۔

سابق وزیر نے کہا کہ پی ڈی ایم کی 13 پارٹیوں میں سے تین بڑی پارٹیوں نے اپنے اپنے انتخابی نشان کی الیکشن کمیشن کو درخواست دے دی ہے پیچھے جو 10 پارٹیاں رہ جاتی ہیں نہ ان کا نام ہے نا کوئی کام ہے بس وقت آنے پر اتحادیوں کی نفسیاتی تعداد بڑھانے کے لیے ان کو استعمال کیا جاتا ہے اور پھر ردی کی ٹوکری میں پھینک دیا جاتا ہے۔

20 دن کا سیاسی کھیل تماشہ باقی رہ گیا ہے بیس دن میں جتنے مخالفین کے خلاف کیس بنانے ہیں اور جو بھی قدم اٹھانے ہی اٹھا لیں ہر روز اتوار نہیں ہوتی پاکستان میں جس کی لاٹھی اُس کی بھنیس ہےجس دن شہبازشریف پرفردجرم لگنی تھی اسی دن وزیر اعظم بن گئے آج پندرہ مہینے بعد سارے کیس ختم ہو…

— Sheikh Rashid Ahmed (@ShkhRasheed) July 21, 2023

انہوں نے مزید کہا کہ مولانا فضل الرحمان سارے ملک سے اپنے امیدوار لائیں گےاور پیپلز پارٹی نون لیگ کا ملبہ اپنے سر پر اٹھانے کے لیے تیار نہیں ہے اور نون لیگ کا لیول پلینگ فیلڈ کا مقابلہ بھی الیکشن کی گھبراہٹ ختم نہیں کر رہا۔  شہباز شریف نواز شریف کے لیے سیاست میں برادر یوسف کا کردار ادا کر رہے ہیں۔ نواز شریف ابھی سعودیہ سے لندن جائیں گے لیکن پاکستان نہیں آئیں گے، وہ کب اور کس حال میں پاکستان آئیں گے یہ اللہ کو پتہ ہے۔

شیخ رشید نے کہا کہ ابھی بجلی اور گیس مزید مہنگی ہوگی ، آٹا اور چینی مہنگی ہوگی ایکسپورٹ اور ترسیلات کم ہوگی جب ڈالر 300 کو کراس کرے گا تو انہیں لگ پتہ جائے گا کہ کتنے بیس کا 100ہوتا ہے۔ پاکستان میں 50 کروڑ روپے تک کی کرپشن جائز قرار دے دی گئی ہے۔ 16 ارب روپے کی کرپشن ہوا میں اڑ گئی اور تحقیقات کرنے والے اللہ کو پیارے ہوگئے۔