عام انتخابات اپنے مقررہ وقت پر ہوں گے، اعظم خان نے سائفر کے جھوٹے ڈرامے کا پول کھول دیا، فیصل کریم

اسلام آباد:وزیر مملکت فیصل کریم کنڈی نے کہا ہے کہ عام انتخابات اپنے مقررہ وقت پر ہوں گے، اعظم خان نے سائفر کےجھوٹے ڈرامے کا پول کھول دیا، 9 مئی کے ذمہ داروں کو قانون کے کٹہرے میں لایا جائے۔

ہفتہ کو یہاں پریس کانفرنس کے دوران گفتگو کرتے ہوئے فیصل کریم کنڈی نے کہا کہ خیبر پختونخوا میں مختلف علاقوں میں دہشتگردی کے واقعات میں امن کے قیام کیلئے ہمارے نوجوانو ں نے اپنی جانوں کا نذرانہ پیش کیا، ملک دشمن عناصرآج بھی امن وامان کی صورتحال خراب کرنے کی سازشیں کر رہے ہیں۔ ہمارے محافظوں نے ہمیشہ جان پر کھیل کر ہمارے لئے قربانیاں دی ہیں۔

انہوں نے کہاکہ سندھ حکومت نے سیلاب متاثرین کیلئے ان کے گھروں کی تعمیر کے وعدے پر عملدرآمد شروع کر دیاہے ، پانچ ہزار بے گھر خواتین کو مالکانہ حقوق دیئے ، 50 ہزار گھروں کیلئے فنڈز جاری ہو چکے ہیں، سندھ حکومت نے 20لاکھ گھروں کی تعمیر کا وعدہ کیا ہے۔ ماضی میں ایک کروڑ نوکریوں اور 50 لاکھ گھروں کے اعلانات کئے گئے تاہم عملدرآمد نہیں ہوسکا۔ سندھ حکومت نے دیگر صوبوں کے مقابلے میں اپنے حقوق کیلئے وفاق سے بہتر جنگ لڑی۔

انہوں نے کہا کہ پیپلز پارٹی کی حکومت آنے والی ہے، دیگر صوبوں میں جب پیپلز پارٹی کی حکومت آئے گی تو سیلاب متاثرین کو سندھ کے ماڈل پر گھر بنا کر دیں گے۔ انہوں نے کہا کہ پیپلز پارٹی کا واضح موقف ہے کہ اسمبلیاں اپنی مدت پوری کرکے بروقت تحلیل ہوں اور وقت پر انتخابات ہوں تا کہ نئی حکومت ملک کی کمان سنبھال کر آگے بڑھے۔ مردم شماری پر اعتراضات ہر جگہ ہیں،بہتر ہوگا کہ گزشتہ مردم شماری پر ہی عام انتخابات کرائے جائیں۔