آذربائیجان اورپاکستان کے درمیان ایل این جی معاہدے سے باہمی تعلقات کی نئی راہیں کھلیں گی،شہباز شریف

 وزیر اعظم محمد شہباز شریف نے کہا ہے کہ حکومت عام آدمی کو بنیادی سہولیات کی فراہمی کے لیے تمام وسائل بروئے کار لا رہی ہے،آذربائیجان اورپاکستان کے درمیان ایل این جی معاہدے سے باہمی تعلقات کی نئی راہیں کھلیں گی،دونوں برادر ممالک کے درمیان تعلقات کے حوالے سے آج ایک اہم دن ہے۔

گورنر ہائوس لاہور میں پاکستان اور آذربائیجان کے مابین پٹرولیم کی صنعت میں تعاون کے معاہدے کے حوالے سے منعقدہ تقریب سے خطاب کرتے ہوئے محمد شہباز شریف نے کہا کہ آج کا دن دونوں برادر ممالک کے درمیان تعلقات کے حوالے سے ایک اہم دن ہے۔حکومت پاکستان آذربائیجان سے ماہانہ ایک جہاز ایل این جی خریدے گی

انہوں نے کہا کہ خریداری کا اختیار پاکستان کے پاس ہو گا جس سے ایل این جی نہ خریدنے پر ہرجانہ نہیں ہو گا۔اس معاہدے سے ملک میں سستی ایل این جی میسر آئے گی اور یہ انرجی کے بحران سے نمٹنے میں بہت بڑی پیش رفت ثابت ہو گی۔اس معاہدے کی مدت ایک سال تک ہے جس کو مزیدایک سال تک بڑھایا جا سکے گا۔ اس پٹرولیم معاہدے کے حوالے سے گزشتہ سال آذربائیجان میں صدر الہام علیوف سے مفید گفتگو ہوئی تھی۔آذربائیجان کے صدر اورپاکستان میں آذربائیجان کے سفیر کا بھی شکریہ ادا کرتا ہوں جنہوں نے اس معاہدے کو پایہ تکمیل تک پہنچانے کے لیے بھرپور کردار ادا کیا۔

اس معاہدے سے دونوں ممالک کے تعلقات مزید بہتر ہوں گے۔ انہوں نے مزید کہاکہ ہم پاکستان کے ساتھ مزید شعبوں میں تعلقات کے خواہاں ہیں۔بعد ازاں پاکستان اور آذربائیجان کے مابین پٹرولیم کی صنعت میں معاہدے کی دستاویزات پر دستخط کئے گئے۔گورنر پنجاب بلیغ الرحمن،وزیر مملکت برائے پٹرولیم مصدق ملک،سیکرٹری پٹرولیم ، پاکستان میں آذربائیجان کے سفیر ،آذر بائیجان کی پٹرولیم کمپنی کی چیف ایگزیکٹو ودیگر بھی اس موقع پر موجود تھے