حکومت عوام کو ریلیف کی بجائے مزید تکلیف دے کر جائے گی،شیخ رشید

عوامی مسلم لیگ کے سربراہ اور سابق وفاقی وزیر داخلہ شیخ رشید احمد نے کہا ہے کہ نگران حکومت کے لئے وزیراعظم کا فیصلہ اتنا آسان نہیں ہوگا جتنا دکھائی دے رہا ہے سیاسی اندھے رشتے داروں میں ریوڑیاں بانٹنا چاہتے ہیں۔ آئینی ترمیم کے بغیر نگران وزیراعظم کو الیکشن کروانے کے علاوہ کوئی اختیارات نہیں مل سکتے۔ آخری 2 ہفتے پاکستان کی سیاست میں انتہائی اہم ہیں یہ عوام کو ریلیف کی بجائے مزید تکلیف دے کر جائیں گے

اپنے ٹویٹ مین شیخ رشید کا کہنا تھا کہ اسحاق ڈار کے آنے کا مطلب آئی ایم ایف ناراض ڈالر 300 کراس اور الیکشن ایک سال آگے۔ الیکشن کی تاخیر معشیت کی تباہی اور غریب کا زندہ دفن ہونا ہے۔ الیکشن میں تاخیر کرنے کے حربے استعمال کریں گے تو اپنا ہی مزید نقصان کریں گے۔ ن لیگ اور پیپلز پارٹی یہ چاہتی ہے کہ نگران وزیراعظم اُن کے جیب کی گھڑی اور ہاتھ کی چھڑی ہو۔

نگران حکومت اور اُس کے وزیراعظم کا فیصلہ اتنا آسان نہیں ہوگا جتنا دکھائی دے رہا ہے سیاسی اندھے رشتے داروں میں ریوڑیاں بانٹنا چاہتے ہیں آئینی ترمیم کے بغیر نگران وزیراعظم کو الیکشن کروانے کے علاوہ کوئی اختیارات نہیں مل سکتے ڈار کے آنے کا مطلب IMF ناراض ڈالر 300 کراس الیکشن ایک…

— Sheikh Rashid Ahmed (@ShkhRasheed) July 24, 2023

سابق وفاقی وزیر نے کہا کہ لندن کے ڈاکٹر بھی بڑے با کمال ہیں وہ نواز شریف کو لندن سعودی عرب اور دبئی جانے کا مشورہ دیتے ہیں لیکن پاکستان جانے کی اجازت نہیں دیتے۔ 15 مہینے بھائی ویزراعظم رہا اور سفارتی پاسپورٹ نواز شریف کے ہاتھ میں رہا لیکن پاکستان آنے کی جرأت نہیں ہوئی۔

انہوں نے مزید کہا کہ حکومت کے چہرے پر اُڑی ہوئی ہوائیاں بتا رہی ہیں کہ ان کو عوام کا ردعمل باخوبی معلوم ہے جو قدم اٹھائیں گے الٹا ان کے گلے پڑے گا۔ سات دنوں بعد جب لوگوں کے گھروں میں بجلی کے بل آئیں گے تو لوگ جھولیاں اٹھا کے ان کے لیےدعا کریں گے۔ آٹا چینی کا بھاؤ اور بجلی کے بل کا بم انکی سیاست کا قبرستان بنا دے گا

کس کارکردگی پر سرکاری افسروں میں نئی گاڑیاں بانٹی جارہی ہیں، ڈیفالٹ تو پاکستان نے نہیں عوام نے ہونا تھا اور عوام ڈیفالٹ ہو چکی ہے۔ حکمران بڑے شوق سے طلوع آفتاب سے غروب آفتاب تک ٹی وی پر چھاونی ڈال کر بیٹھے رہیں نہ ان کے چہرے کو پسند کیا جا رہا ہے نہ ان کی کوئی بات سن رہا ہے بلکہ یہ الیکٹرونک میڈیا کی ریٹنگ خراب کر رہے ہیں، بے شک سارےمیڈیا پےقبضہ کرلیں صحافت کو ہتھکڑیاں پہنا دیں۔