پنجاب میں سرکاری افسران کےلئے نئی گاڑیاں خریدنے کے خلاف درخواست پر سماعت

پنجاب بھر میں سرکاری افسران کےلئے نئی گاڑیاں خریدنے کے خلاف لاہور ہائی کورٹ میں سماعت ہوئی،عدالت نے نگران پنجاب حکومت سے 10 دن میں تفصیلی رپورٹ طلب کر لی۔

عدالت نے حکم دیا کہ بتایا جائے کہ اس وقت صوبے میں کتنی گاڑیاں محکموں اور افسران کے پاس ہیں،عدالت نے ریمارکس دیئےکہ اگر جواب تسلی بخش نہ ہوئے تو متعلقہ افسر کو طلب کیا جائے گا۔عدالتی اطمینان کے بعد مناسب حکم جاری کیا جائے گا۔

پنجاب بھر کے اسسٹنٹ کمشنرز سمیت ضلعی افسروں کیلئے نئی گاڑیاں خریدنے  کے اقدام کو لاہور ہائیکورٹ میں چیلنج کیا گیا مقامی وکیل فرحت منظور چانڈیو نے شبیر حسین ایڈووکیٹ کے توسط سےصوبے کے سرکاری محکموں اور افسروں کے زیر استعمال گاڑیوں کی تفصیلات کیلئے ہائیکورٹ میں درخواست دائر کی گئی۔

دائر درخواست  میں نشاندہی کی گئی کہ حال ہی میں آئی ایم ایف سے سخت شرائط پر حکومت نے قرض لیا. کڑی شرائط پر قرض کے بعد غریب عوام پر بھاری ٹیکسز عائد کردیئے گئے.

درخواست میں افسوس کا اظہار کیا گیا کہ غریب عوام مہنگائی اور بھوک سے خود کشیاں کر رہی ہے اور پنجاب حکومت نے غریب عوام کو ریلیف دینے کی بجائے افسروں کیلئے نئی گاڑیاں خریدنے کا فیصلہ کیا.

درخواست میں بتایا گیا کہ پنجاب حکومت نے دو ارب 33 کروڑ روپے سے زائد اسسٹنٹ کمشنرز اور افسران کی گاڑیوں کیلئے فنڈز جاری کر دیئے حالانکہ صوبے بھر کے اسسٹنٹ کمشنرز، افسروں اور محکموں کے پاس پہلے ہی بڑی تعداد میں گاڑیاں موجود ہیں.

درخواست میں یہ اعتراض بھی اٹھایا گیا کہ نگران حکومت نے اختیارات نہ ہونے کے باوجود اربوں روپے گاڑیوں کی خریداری کیلئے جاری کئے،  اس لیے استدعا کی جاتی ہے کہ افسروں کو گاڑیاں دینے کا نوٹیفکیشن کالعدم قرار دیا جائے.