کوئٹہ میں 7، 9 اور 10 محرم کو موبائل فون سروس معطل

کوئٹہ: کوئٹہ میں 07 محرم (آج)، 09 اور 10 محرم کو موبائل فون اور انٹرنیٹ سروس بند کردی گئی ہے۔

سیکیورٹی خدشات کے پیش نظر حساس اضلاع میں موٹرسائیکل کی ڈبل سواری پر بھی پابندی عائد کردی گئی ہے جبکہ سبی، نصیرآباد اور کوئٹہ ڈویژن کو انتہائی حساس قرار دیا گیا ہے۔

کوئٹہ میں آج 07 محرم کا جلوس برآمد ہوگا جس کے لیے حکام کی جانب سے متعلقہ راستوں کو سیل کردیا گیا ہے۔ جلوس آج دوپہر 2 بجے آرٹ اسکول روڈ سے روانہ ہوگا جو پرنس روڈ سے ہوتا ہوا مگنی روڈ پہنچے گا جو دوبارہ پرنس روڈ سے ہوتا ہوا آرٹ اسکول روڈ پر اختتام پذیر ہوگا۔

اطلاعات کے مطابق پولیس، فرنٹیئر کانسٹیبلری (ایف سی) اور دیگر سیکیورٹی اداروں نے منگل کی شب جلوس کے راستوں کو سیل کردیا تھا جب کہ کسی بھی ناخوشگوار صورتحال سے نمٹنے کے لیے پولیس کی بھاری نفری تعینات کردی گئی ہے۔

ساتویں محرم الحرام کے موقع پر کوئٹہ میں آج صبح 9 بجے سے رات 8 بجے تک موبائل فون اور انٹرنیٹ ڈیٹا سروس معطل رہے گی جب کہ جلوس کی سیکیورٹی کے لیے 2500 سے زائد اہلکار تعینات کیے جائیں گے۔