نیدرلینڈزکی سائیکلسٹ یارا کاسٹیلیجن نے ویمنز ٹور ڈی فرانس فیمز ریس 2023کا چوتھا مرحلہ اپنے نام کرلیا

فرانس: نیدرلینڈزکی ویمن سائیکل سوار یارا کاسٹیلیجن نے خواتین کی ٹورڈی فرانس فیمز ریس2023 کا چوتھا مرحلہ جیت لیا ۔یہ نیدرلینڈز کی سائیکل سوار یارا کاسٹیلیجن کی ریس میں پہلی فتح ہے۔

خواتین کی ٹورڈی فرانس فیمز سائیکل ریس 2023کے دوسرے ایڈیشن کا آغاز ہوچکا ہے۔ جس میں دنیا بھر کی سائیکلنگ کی 22ٹیموں کی نامور سائیکل سوار ٹائٹل کے حصول کے لئے کوشاں ہیں۔

ٹور ڈی فرانس فیمز سائیکل ریس کے چوتھے مرحلے میں خواتین سائیکل سواروں نےفرانس میں کہورز سے روڈیز تک 177 کلو میٹر فاصلہ طے کرنا تھا، جو پہاڑی پر واقع تھا۔ 25 سالہ نیدرلینڈز کی سائیکل سوار یارا کاسٹیلیجن نے عمدہ سائیکلنگ کا مظاہرہ کرتے ہوئے 177 کلومیٹر کا فاصلہ 4 گھنٹے 38منٹ اور 39 سیکنڈز میں طے کرکے پہلی پوزیشن حاصل کی۔ نیدرلینڈز کی ہی سائیکل سوار وولرنگ ڈیمی نے دوسری جبکہ نیدرلینڈز کی ہی 29سالہ سائیکل سوار کوسٹر انوسکا نے تیسری پوزیشن حاصل کی۔

بیلجیم کی سائیکل سوار کوپیکی لوٹی کا یلو جرسی پر قبضہ برقرار ہے ۔ ٹور ڈی فرانس فیمز سائیکل ریس 8 مرحلوں پر محیط ہوگی جس میں سائیکل سوار 956کلو میٹر کا سفر طے کریں گی ۔ خواتین کی ٹور ڈی فرانس فیمز سائیکل ریس میں 22 ٹیمیں ٹائٹل کے حصول کے لئے ایکشن میں ہیں جو 8 روز جاری رہنے کے بعد 30 جولائی کو اختتام پذیر ہوگی۔ خواتین کی ٹور ڈی فرانس فیمز سائیکل ریس میں نیدرلینڈز کی سائیکلسٹ ٹیم موویسٹار کی اینیمیک وین ویلیوٹین اپنے اعزاز کا دفاع کے لئے کوشاں ہیں ۔