سپیکر قومی اسمبلی کا کیپٹن محمد سرور شہید نشان حیدر کی 75 ویں برسی پر خراج عقیدت

اسلام آباد: سپیکر قومی اسمبلی راجہ پرویز اشرف نے کیپٹن محمد سرور شہید ( نشان حیدر ) کی 75 ویں برسی پر خراج عقیدت پیش کرتے ہوئے کہا ہے کہ کیپٹن محمد سرور شہید نے 1948میں کشمیر کی اوڑی سیکٹر میں دفاع وطن کی خاطر جام شہادت نوش فرمایا اور ہمیشہ کیلئے امر ہو گئے۔ جمعرات کو اپنے پیغام میں انہوں نے کہا کہ کیپٹن محمد سرور شہید نے بہادری اور شجاعت کی بے مثال تاریخ رقم کی۔

کیپٹن سرور شہید کی بہادری اور شجاعت کی بدولت انہیں ملک کے سب بڑے عسکری اعزاز (نشان حیدر)سے نوازا گیا۔ پوری قوم کیپٹن محمد سرور شہید کو ان کی 75 ویں برسی پر خراج عقیدت اور ان کی بہادری و جرات پر سلام پیش کرتی ہے۔ انہوں نے کہا کہ کیپٹن محمد سرور شہید نشان حیدر نے مادر وطن کے دفاع کیلئے اپنی جان کا نذرانہ پیش کیا۔

کشمیر کی وادیاں آج بھی کیپٹن محمد سرور شہید کی بہادری اور شجاعت کی گواہی دیتی ہیں۔شہدا ہمارے حقیقی ہیروز ہیں اور زندہ قومیں اپنے ہیروز کو ہمیشہ یاد رکھتی ہیں۔شہدا کی قربانیوں کی بدولت آج ہم آزاد فضاوں میں سانس لے رہے ہیں۔قوم کو اپنے بہادر اور جری سپوتوں پر فخر ہے۔شہدا کی قربانیاں اتحاد ،اخوت اور بھائی چارے کا درس دیتی ہیں۔