آرمی ایکٹ 1952ء میں ترمیم کا بل سینیٹ سے منظور

آرمی ایکٹ 1952ء میں ترمیم کا بل سینیٹ سے منظور ہو گیا۔ چیئرمین سینیٹ صادق سنجرانی کی سربراہی میں اجلاس میں وزیر دفاع اور وزیر قانون نے مشترکہ طور پر آرمی ایکٹ 1952ء میں ترمیم کا بل پیش کیا۔

بل کے مطابق سرکاری حیثیت میں پاکستان کی سلامتی اور مفاد میں حاصل معلومات کا غیر مجاز انکشاف کرنے والے شخص کو 5 سال تک سخت قید کی سزا دی جائے گی تاہم آرمی چیف یا بااختیار افسر کی اجازت سے انکشاف کرنے والے کو سزا نہیں ہو گی۔

بل کے متن کے مطابق پاکستان اور افواج پاکستان کے مفاد کے خلاف انکشاف کرنے والے سے آفیشل سیکرٹ ایکٹ اور آرمی ایکٹ کے تحت نمٹا جائے گا۔ اس قانون کے ماتحت شخص سیاسی سرگرمی میں حصہ نہیں لے گا، متعلقہ شخص ریٹائرمنٹ، استعفی یا برطرفی کے دو سال بعد تک سیاسی سرگرمی میں حصہ نہیں لے گا۔ حساس ڈیوٹی پر تعینات شخص 5 سال تک سیاسی سرگرمی میں حصہ نہیں لے سکے گا۔

بل کے مطابق متعلقہ شخص ریٹائرمنٹ، استعفی یا برطرفی کے دو سال بعد تک سیاسی سرگرمی میں حصہ نہیں لے گا۔ سیاسی سرگرمی میں حصہ لینے پر پابندی کی خلاف ورزی کرنے والے کو دو سال تک سخت سزا ہو گی۔

ترمیمی بل کے مطابق آرمی ایکٹ کے ماتحت شخص اگر الیکڑنک کرائم میں ملوث ہو جس کا مقصد پاک فوج کو بدنام کرنا ہو تو اس کے خلاف الیکٹرانک کرائم کے تحت کاروائی کی جائے گی۔ آرمی ایکٹ کے تحت شخص اگر فوج کو بدنام کرے یا اس کے خلاف نفرت انگریزی پھیلائے اسے دو سال تک قید اور جرمانہ ہوگا۔

سینیٹر رضا ربانی نے بتایا کہ کچھ بلز ہمیں آج صبح ملے ہیں، ان بلز کا تعلق آرمی ایکٹ، کنٹونمنٹس اور ڈی ایچ اے ایکٹ سے ہے۔ آرمی ایکٹ ترمیمی بل کو متعلقہ قائمہ کمیٹی میں بھیجا جائے۔ سینیٹ میں بل عجلت میں منظور کرائے جارہے ہیں، بل کی کاپی آج صبح 10 بجے دی گئی، بل پڑھنے کا موقع بھی نہیں دیا گیا۔

رضا ربانی نے کہا کہ ایوان میں حالیہ قانون سازی پر تحفظات ہیں، اس اندھی قانون سازی پر سینیٹ سے واک آؤٹ کرتاہوں، جس کے بعد رضا ربانی نے سینیٹ اجلاس سے واک آؤٹ کردیا۔ آرمی ایکٹ ترامیم پر رضا ربانی کے ساتھ سینیٹر طاہر بزنجو بھی ایوان سے واک آؤٹ کرگئے۔