عدالت نے عمران خان کی 6 مقدمات دوسری عدالت منتقلی کی درخواستیں مسترد کر دی

اسلام آباد ہائیکورٹ نے پاکستان تحریک انصاف (پی ٹی آئی) کے چیئرمین عمران خان کے خلاف 9 مئی واقعات، جعلسازی سمیت  دیگر 6 مقدمات دوسری عدالت منتقلی کی درخواستیں مسترد کردیں۔

اسلام آباد ہائیکورٹ کے چیف جسٹس عامرفاروق نے عمران خان اور بشریٰ بی بی کی درخواستوں پر محفوظ فیصلہ سنا دیا۔

واضح رہے کہ چیئرمین پی ٹی آئی اور بشری بی بی نے کیسز منتقلی درخواستیں دائر کی ہوئی تھیں،اسلام آباد ہائیکورٹ نے اپنے فیصلے میں کہا کہ ہر کیس کے اپنے میرٹس ہیں اس کا فیصلہ انہی کے مطابق ہوتا ہے۔

بیان کی گئی وجوہات کی بنا پر کیسز دوسری عدالت منتقلی کا جواز نہیں بنتا، کورٹ کی جگہ تبدیلی کے لیے چیف کمشنر کو درخواست دے سکتے ہیں۔دوسری جانب سیکورٹی خدشات کی صورت میں چیئرمین پی ٹی آئی کو چیف کمشنر سے رجوع کی ہدایت کی گئی ہے ۔

یاد رہے کہ گزشتہ روز اسلام آباد ہائیکورٹ کے چیف جسٹس عامر فاروق نے عمران خان اور بشریٰ بی بی کی جانب سے کیسز ٹرائل کے لیے کسی اور کورٹ کو منتقل کرنے کی درخواستوں پر دلائل سننے کے بعد فیصلہ محفوظ کرلیا۔