سعودی عرب پاکستان میں 24 ارب ڈالر کی سرمایہ کاری کرے گا

اسلام آباد: سعودی عرب نے پاکستان میں 24 ارب ڈالر کی سرمایہ کاری کا عندیہ دے دیا۔

تفصیلات کے مطابق وزیر مملکت برائے پیٹرولیم مصدق ملک نے نجی نیوز چینل سے گفتگو کرتے ہوئے سعودی عرب کی جانب سے پاکستان میں سرمایہ کاری کے ارادے کی تصدیق کردی۔

مصدق ملک نے کہا کہ پاکستان میں 24 ارب ڈالر کی سرمایہ کاری کا عندیہ دیا گیا ہے۔

انہوں نے مزید کہا کہ زراعت، انفارمیشن ٹیکنالوجی (آئی ٹی) اور توانائی کے تین شعبوں میں سرمایہ کاری کے بہت سے مواقع موجود ہیں۔

خیال رہے کہ اس سے قبل وفاقی وزیر خزانہ اسحاق ڈار نے اسلام آباد میں پریس کانفرنس کرتے ہوئے کہا تھا کہ دوست ملک سعودی عرب نے اسٹیٹ بینک آف پاکستان (ایس بی پی) میں 2 ارب ڈالر جمع کرائے ہیں۔