ویسٹ انڈیز نے دوسرے ٹی ٹونٹی کرکٹ میچ میں بھارت کو 2 وکٹوں سے ہرا کر سیریزمیں 0-2 کی برتری حاصل کرلی

گیانا: ویسٹ انڈیز نے دوسرے ٹی ٹونٹی کرکٹ میچ میں بھارت 2 وکٹوں سے ہرا کر پانچ میچوں کی سیریز میں 0-2 کی برتری حاصل کرلی ۔فاتح ویسٹ انڈین ٹیم نے بھارتی ٹیم کی طرف سے ملنے والا 153 رنز کا ہدف 18.5 اوورز میں 8 وکٹوں کے نقصان پر حاصل کرلیا۔ وکٹ کیپر بلے باز نکولس پوران کی 67 رنز کی دھواں دار اننگز نے اپنی ٹیم کی فتح میں اہم کردار ادا کیا۔

بھارتی تلک ورما کی نصف سنچری رائیگاں گئی۔ پروویڈنس سٹیڈیم، گیانا میں کھیلے گئے پانچ میچوں کی سیریز کے دوسرے ٹی ٹونٹی میچ میں بھارتی کپتان اور مایہ ناز آل رائونڈر ہاردک پانڈیا نے ٹاس جیت کر پہلے بیٹنگ کا فیصلہ کیا۔ بھارتی ٹیم نے پہلے بیٹنگ کرتے ہوئے مقررہ 20 اوورز میں 7 وکٹوں پر 152 رنز بناکر میزبان ٹیم کو میچ میں کامیابی کے لئے 153 رنز کا ہدف دیا۔ تلک ورما نے 51 رنز کی اننگز کھیلی ،ایشان کیشان نے 27 اور ہاردک پانڈیا نے 24 رنز بنائے۔ویسٹ انڈین روماریو شیفرڈ، الزاری جوزف اور عقیل حسین نے دو، دو کھلاڑیوں کو آئوٹ کیا۔

جواب میں وکٹ کیپر بلے باز نکولس پوران کی دھواں دار 67 رنز کی بدولت ویسٹ انڈیز ٹیم نے 153 رنز کا مطلوبہ ہدف 18.5 اوورز میں 8 وکٹوں کے نقصان پر حاصل کرکے پانچ میچوں کی سیریز میں 0-2 کی برتری قائم کرلی ۔ نکولس پوران نے 40گیندوں کا سامنا کرتے ہوئے 4 چھکوں اور 6 چوکوں کی مدد سے انفرادی 67 رنز سکور کئے ۔ بھارتی بائولرز میں سے ہاردک پانڈیا نے تین، یوزویندر چہل نے دو جبکہ ارشدیپ اور مکیش نے ایک ایک کھلاڑی کو آئوٹ کیا۔ نکولس پوران کو عمدہ بیٹنگ پر میچ کا بہترین کھلاڑی قرار دیا گیا۔