چیئرمین پی ٹی آئی کو جیل میں نہایت ناگفتہ بہہ اور غیرانسانی ماحول میں رکھا گیا ہے،پاکستان تحریک انصاف

چیئر مین تحریک انصاف عمران خان کی گرفتاری کے حوالے سے پاکستان تحریک انصاف کی کور کمیٹی نے اعلامیہ جاری کر دیا ۔

تفصیلات کے مطابق ‎پاکستان تحریک انصاف کی کور کمیٹی کا اہم ترین اجلاس  ہوا اجلا س میں چیئرمین پاکستان تحریک انصاف کو اٹک جیل میں نہایت ناگفتہ بہہ اور غیرانسانی ماحول میں قید کئے جانے کی شدید مذمت کی گئی، قوم کے معتبر ترین قائد، پاکستان کی سب سے بڑی جماعت کے سربراہ اور سابق وزیراعظم کو جس اذیتناک، غیرانسانی اور صحت و سلامتی کے حوالے سے خطرناک ماحول میں قید کیا گیا ہے وہ شرمناک ہے

اعلامیے میں مزید کہا گیا کہ نفرت و انتقام کی آگ میں قانون کا خون کرنے والے فسطائی قوم کو اپنی وحشت کا جواب دیں گے، خیبرپختونخوا میں بلدیاتی انتخابات میں تحریکِ انصاف کی فقیدالمثال کامیابی چیئرمین تحریک انصاف  پر قوم کے اعتماد کی مظہر ہے، عمران خان نے پیش گوئی کی تھی کہ انہیں قید کیا جائے یا وہ آزاد ہوں، عوام تحریک انصاف ہی کو اپنے ووٹ کا حقدار تصوّر کرتے ہیں۔

پاکستان تحریک انصاف کی کور کمیٹی کا اعلامیہ pic.twitter.com/OPMKIpop2y

— PTI (@PTIofficial) August 7, 2023

پی ٹی آئی کے ترجمان کا کہنا تھا کہ  تحریک انصاف مشترکہ مفادات کونسل کے ذریعے ملک میں آئینی و جمہوری بحران پیدا کرنے کی حکومتی کوششوں کی شدید مذمت کرتے ہیں۔پاکستان کا مستقبل آئین کی روح کے مطابق صاف شفاف انتخابات میں پوشیدہ ہے،مردم شماری اور حلقہ بندیوں میں ردّوبدل کی آڑ میں انتخابات کے غیرمعیّنہ مدت تک التوا کی ناپاک سازش کی جارہی ہے،

کور کمیٹی نے مزید کہا کہ نااہل، بددیانت، بدنیّت اور منافقت کی آخری حدوں کو چھوتا بندوبست اپنی صفوں میں موجود واضح تقسیم چھپا کر جمہوریت پر شب خون مارنے کی کوششوں میں مصروف ہے،تحریک انصاف عوامی منشاء کی روشنی میں آئین، جمہوریت اور انتخاب کیخلاف کی جانے والی ہر سازش کا ہر سطح پر ہر ممکنہ آئینی، قانونی اور جمہوری طریقے سے مقابلہ کرے گی،چند گھنٹوں کی مہمان حکومت کے ہاتھوں عوام کے معاشی قتلِ عام کی بھی شدید مذمت کرتے ہیں۔