وزیر اعظم کا جی ایچ کیو میں شہداء اور غازیان کے اعزاز میں منعقدہ تقریب میں شرکت

وزیراعظم محمد شہباز شریف نے کہا ہے کہ پاکستان شہداء اور غازیوں کی قربانیوں کی بدولت سکیورٹی کے لحاظ سے ہمیشہ کیلئے محفوظ ہو چکا ہے، موجودہ حکومت نے ملک کو مشکل ترین معاشی حالات سے نکالنے کیلئے بے پناہ کام کیا، پاکستان کی ترقی و خوشحالی کا ایک جامع اور مربوط نظام وجود میں آ چکا ہے، مل کر آگے بڑھیں گے تو کوئی مشکل ہماری راہ میں حائل نہیں ہو سکتی۔

جی ایچ کیو میں شہداء کے اہل خانہ اور غازیان کے اعزاز میں منعقدہ تقریب سے خطاب کرتے ہوئے  وزیراعظم نے کہا کہ پاکستان کے دفاع کیلئے انہوں نے جو عظیم قربانیاں دیں اس کی مثال نہیں ملتی، پاکستان کے معرض وجود میں آنے سے لے کر آج تک ان قربانیوں کا سلسلہ جاری ہے۔ اس عظیم اور پروقار تقریب میں شہداء کے خاندانوں اور غازیوں سے ملاقات میرے لئے باعث فخر ہے۔

وزیراعظم نے کہا کہ مادر وطن کے دفاع کیلئے شہداء نے جرات اور بہادری سے دشمن کا مقابلہ کیا، آج پاکستان کو قائم ہوئے 76 سال ہونے کو ہیں، پاکستان کو محفوظ بنانے کیلئے شہداء اور غازیوں کی قربانیاں قیامت تک یاد رکھی جائیں گی، ہمارے شہیدوں اور غازیوں نے اپنی قربانیوں سے جو راستہ متعین کیا ہمیں اس پر چلنا ہے۔

وزیراعظم نے کہا کہ قوم اپنے شہداء کی قربانیوں کو کبھی فراموش نہیں کر سکتی۔ پاکستان ایک جوہری طاقت ہے، شہداء اور غازیوں کی قربانیوں کی بدولت سکیورٹی کے لحاظ سے پاکستان قیامت تک کیلئے محفوظ ہو چکا ہے، دشمن اب ہمیں میلی آنکھ سے نہیں دیکھ سکتا۔ موجودہ حکومت کی بے پناہ محنت کی بدولت پاکستان مشکل ترین حالات سے نکل آیا ہے، ہم سب نے مل کر پاکستان کی دوبارہ تعمیر کرنی ہے۔

انہوں نے کہا کہ دنیا میں عزت و وقار سے جینے کے مزید تقاضے بھی ہیںٍ، ہمیں غربت اور بیروزگاری کا خاتمہ کرنا ہے، شہداء اور غازیوں کو خراج عقیدت پیش کرنے کا بہترین طریقہ پاکستان کو معاشی لحاظ سے مضبوط ملک بنانا ہے، وسائل کی بندر بانٹ کی بجائے وسائل کی منصفانہ تقسیم کیلئے ایک نظام پر متفق ہونا ہے، ہم سب نے مل کر پاکستان کی دوبارہ تعمیر کرنی ہے۔

انہوں نے کہا کہ کل ہماری حکومت کی مدت ختم ہو جائے گی، آئینی تقاضے کے مطابق اقتدار نگران حکومت کے حوالے کر دیں گے۔ پاکستان کی ترقی و خوشحالی کا ایک جامع مربوط نظام وجود میں آ چکا ہے، حکومت اور تمام اداروں نے مل کر ایک جامع نظام وضع کیا ہے، ملکی ترقی و خوشحالی کیلئے چار شعبوں پر توجہ دی جا رہی ہے، ہمیں زراعت کے شعبے کو ترقی دینی ہے، معدنیات کے کھربوں ڈالر کے ذخائر کو استعمال میں لانا ہے، انفارمیشن ٹیکنالوجی کو فروغ دینا ہے، دفاعی صلاحیتوں کو مزید مستحکم کرنا ہے۔

وزیراعظم نے کہا کہ دنیا اور خلیجی ممالک سے اربوں ڈالر کی سرمایہ کاری متوقع ہے، اگر ہم مل کر آگے بڑھیں گے تو کوئی مشکل ہمارے آڑے نہیں آئے گی۔ انہوں نے کہا کہ آرمی چیف جنرل سیّد عاصم منیر اور ان کی ٹیم نے پاکستان کی ترقی کا جو ماڈل دیا اس پر وہ لائق تحسین ہیں، ایس آئی ایف سی پاکستان کی ترقی کا روڈ میپ ہے

اس موقع پر وفاقی وزارء خواجہ محمد آصف، مریم اورنگزیب، احسن اقبال، پاک فوج کے سربراہ جنرل سیّد عاصم منیر اور مسلح افواج کے اعلیٰ افسران کے علاوہ شہداء کے اہل خانہ اور غازیان کی بڑی تعداد بھی موجود تھی۔