لاہور ہائی کورٹ کی چودھری پرویز الہٰی سے اہلیہ کی 10اگست کو ملاقات کرانے کی ہدایت

لاہور ہائی کورٹ نے سابق وزیرِ اعلیٰ پنجاب چودھری پرویز الہٰی سے اہلیہ کی 10اگست کو ملاقات کرانے کی ہدایت کر دی۔جسٹس راحیل کامران نے پرویز الہٰی کی اہلیہ قیصرہ الہٰی کی درخواست پر سماعت کی۔

عدالت نے کہا کہ سرکاری وکیل ملاقات کرا کے عدالت کو آگاہ کریں،قیصرہ الہٰی کی جانب سے درخواست میں مؤقف اپنایا گیا کہ تمام مقدمات میں پرویز الہٰی کی ضمانتیں منظور ہونے کے باوجود انہیں نظر بند کیا گیا ہے،درخواست میں استدعا کی گئی کہ چودھری پرویز الہٰی سے ملاقات کی اجازت دی جائے۔ بعدازاں عدالت نے سابق وزیرِ اعلیٰ پنجاب چودھری پرویز الہٰی سے اہلیہ کی 10اگست کو ملاقات کرانے کی ہدایت کر دی

دوسری طرف مونس الہیٰ کی اہلیہ کا نام ای سی ایل میں شامل کرنے کے خلاف درخواست پر لاہور ہائی کورٹ میں سماعت کے دوران ڈائریکٹر ایف آئی اے لاہور نے جواب جمع کرا دیا گیا ہے۔ عدالت نے وفاقی سیکرٹری داخلہ کو جواب داخل کرانے کی آخری مہلت دے دی اور کہا کہ آئندہ سماعت میں اپنا جواب داخل کرائے۔

ایف آئی اے نے جواب میں موقف اختیار کیا ہے کہ مونس الہیٰ کی اہلیہ کے خلاف کیس ایف آئی اے میں زیر سماعت ہے اور یہ خدشہ ہے کہ اگر وہ بیرون ملک چلی گئیں تو واپس نہیں آئیں گی، اسی بنیاد پر ان کا نام ای سی ایل میں ڈالا گیا ہے۔