وکیل قتل کیس،چیئرمین پی ٹی آئی کو گرفتار نہ کرنے کا حکم

سپریم کورٹ میں وکیل قتل کیس نامزدگی کیخلاف چیئرمین پی ٹی آئی کی درخواست پر سماعت ہوئی ،سپریم کورٹ نے وکیل قتل کیس میں عمران خان کو گرفتار نہ کرنے کا حکم دیدیا۔ جسٹس یحیی آفریدی کی سربراہی میں تین رکنی بنچ نے سماعت کی۔ جسٹس مظاہر علی اکبر نقوی اور جسٹس حسن اظہر رضوی تین رکنی بینچ میں شامل ہیں۔

عدالت نے دوران سماعت ریمارکس دیے کہ وکیل قتل کیس میں چیئرمین پی ٹی آئی کو گرفتار نہ کرنے کا حکم برقرار رہے گا۔

دوران سماعت مدعی مقدمہ کے وکیل امان اللہ کنرانی اور جسٹس مظاہر نقوی کے درمیان تلخ جملوں کا تبادلہ ہوگیا۔ چیئرمین پی ٹی آئی کے وکیل لطیف کھوسہ نے کہا کہ چیئرمین پی ٹی آئی کو دوسرے مقدمے میں گرفتار کرلیا گیا، وکیلوں کو طلب کیا جارہا ہے۔

جسٹس یحیٰ آفریدی نے ریمارکس دیے کہ ہمارے سامنے دوسرے کیس نہیں صرف کوئٹہ وکیل قتل کیس ہے، اسی پر دلائل دیں۔

دوران سماعت شکایت کنندہ کے وکیل امان اللہ کنرانی نے بنچ کے دو اراکین پر اعتراض اٹھا دیا۔ وکیل نے کہا کہ بنچ کے رکن جسٹس مظاہر نقوی نے غلام محمود ڈوگر کیس میں انتخابات پر ازخودنوٹس لیا۔ بنچ کے رکن جسٹس حسن اظہر رضوی جونئیر جج کے طور پر تعینات ہوئے۔ جسٹس حسن اظہر رضوی کے خلاف سندھ ہائیکورٹ میں مقدمہ زیر التوا ہے۔ ایک ہمارے مقدمے کو میرٹس پر نہیں سنا جا رہا۔ 

جسٹس حسن اظہر رضوی نے استفسار کیا کہ آپ ججز کی کردار کشی کیسے کر سکتے ہیں؟

جسٹس مظاہر نقوی نے کہا کہ آپ کو اجازت کس نے دی ہے کہ اس طرح سے ہمارے بارے میں بات کریں؟

جسٹس حسن اظہر رضوی نے مکالمہ کرتے ہوئے کہا کہ میرے خلاف سندھ ہائیکورٹ میں کون سا کیس زیر التوا ہے؟ ثبوت دیں۔

جسٹس مظاہر نقوی نے امان اللہ کنرانی سے مکالمہ کرتے ہوئے کہا کہ آپ کو کیا ہدایات دے کر بھیجا گیا ہے ؟ ہم بے جان نہیں ہیں جھوٹے الزامات کا جواب دیں گے۔

سپریم کورٹ نے سماعت 24 اگست تک ملتوی کر دی۔