سائفر کی تحقیقات کیلئے ایک بااختیار اور اعلیٰ سطحی عدالتی کمیشن تشکیل دیا جائے،پی ٹی آئی

تفصیلات کےمطابق امریکہ میں پاکستانی سفیر کی جانب سے بھجوائے گئے خفیہ مراسلے (سائفر) کے حوالے سے عالمی میڈیا میں چھپنے والی خبر کے  معاملے پر تحریک انصاف نےدی انٹرسیپٹ کی خبر پر باضابطہ اعلامیہ جاری کر دیا۔

 تحریک انصاف نے اپنے اعلامیے میں کہا کہ خفیہ مراسلے (سائفر) کے حوالے سے منظرِعام پر آنے والی تفصیلات نے چیئرمین تحریک انصاف  کے مؤقف کی صحت اور ساکھ پر مہرِ تصدیق ثبت کی ہے، چیئرمین تحریک انصاف  کی آئینی و جمہوری حکومت کے خلاف ایک سازش کے نتیجے میں تحریک عدمِ اعتماد لائی گئی، تحریک عدم اعتماد کے تناظر میں سائفر پر چیئرمین تحریک انصاف  کا مؤقف آج پوری طرح ثابت ہوا۔

اعلامیے میں کہا گیا کہ سابق وزیراعظم  کی زیر صدارت قومی سلامتی کمیٹی نے سائفر کے مندرجات کو پاکستان کے اندرونی معاملات میں صریح مداخلت قرار دیا، قومی سلامتی کمیٹی کے عمران خان کی زیرِصدارت اجلاس میں پاکستان کے اندرونی معاملات میں مداخلت کو کسی طور ناقابلِ قبول قرار دیا گیا۔ تحریک انصاف قومی سلامتی کمیٹی نے متفقہ فیصلہ بھی کیا پاکستان امریکہ سے سفارتی آداب کے مطابق ڈیمارش کے ذریعے شدید احتجاج کرے گا،

امریکہ میں پاکستانی سفیر کی جانب سے بھجوائے گئے خفیہ مراسلے (سائفر) کے حوالے سے عالمی میڈیا میں چھپنے والی خبر کا معاملہ

پاکستان تحریک انصاف نے دی انٹرسیپٹ کی خبر پر باضابطہ اعلامیہ جاری کر دیا#عمران_خان_سچا_ہے pic.twitter.com/ID8QQpoRxE

— PTI (@PTIofficial) August 10, 2023

بعد ازاں وزیراعظم شہباز شریف کی زیرِ صدارت قومی سلامتی کمیٹی کے اجلاس میں ان تمام فیصلوں کی مکمل تائید و توثیق کی گئی، حکمران گروہ نے اس خفیہ مراسلے (سائفر) کی اہمیت و مطابقت کو کم کرنے کیلئے بار بار اپنے پاؤں پر کلہاڑی چلائی، حکمران گروہ نے سائفر کے وجود سے انکار کیا تو کبھی اسے بےمعنی اور بے وقعت قرار دیا۔ سائفر کو منظرِعام پر لانے کا الزام چیئرمین پاکستان تحریک انصاف پر عائد کرنے کی کوشش کی ذریعے ایک اور حماقت کی گئی۔

مراسلے میں کہا گیا کہ لازم ہے کہ اس خفیہ مراسلے پر کی جاننے والی بحث و تمحیص کو اس کے ٹھیک تناظر میں رکھا جائے، تسلیم کیا جائے کہ فی الواقع پاکستان کے اندرونی معاملات میں مداخلت کی گئی، پاکستان کے اندرونی معاملات میں مداخلت وزیراعظم چیئرمین تحریک انصاف کیخلاف تحریک عدمِ اعتماد پر منتج ہوئی،

اعلامیے میں پاکستان تحریک انصاف نے مطالبہ کیا ہے کہ معاملے کی جامع تحقیقات کیلئے ایک بااختیار اور اعلیٰ سطحی عدالتی کمیشن تشکیل دیا جائے، سائفر پر عدالتی کمیشن کی تحقیقات کو منظرِ عام پر لایا جائے۔