پرویز خٹک نے نگران وزیر اعظم کےلئے صادق سنجرانی کو موزوں امیدوار قرار دے دیا

پاکستان تحریک انصاف پارلیمنٹرین کے صدر پرویز خٹک نے چیئرمین سینیٹ صادق سنجرانی کو نگراں وزیراعظم کیلیے موزوں ترین امیدوار قرار دے دیا جبکہ استحکام پاکستان پارٹی (آئی پی پی) نے بھی اپوزیشن لیڈر کے ناموں کی حمایت کا اعلان کردیا۔

پرویز خٹک نے کہا کہ  نگران وزیراعظم کے لئے راجہ ریاض کے تجویزکردہ  ناموں کی مکمل حمایت کرتے ہیں اور ہماری نظر میں اس عہدے کے لیے صادق سنجرانی موزوں امیدوار ہیں،صادق سنجرانی اچھی شہرت کے مالک ہیں اور مخلص سیاستدان ہیں۔

استحکام پاکستان پارٹی کے چیئرمین جہانگیر خان ترین نے کہا کہ نگران وزیراعظم کے لئے راجہ ریاض احمد کے تجویز کردہ ناموں کی حمایت کرتے ہیں اور اُن کے ساتھ ہیں، اپوزیشن کی طرف سے نگراں وزیر اعظم  مقررہونا زیادہ بہتر ہوگا۔

انہوں نے کہا کہ نگران حکومت کی تشکیل کیلئے استحکام پاکستان پارٹی اپوزیشن کے ساتھ ہے، امید ہے عبوری حکومت کا معاملہ افہام و تفہیم کے ساتھ جلد حل ہو جائے گا۔