ملک بھرمیں جشن آزادی کی تیاریاں عروج پر ،شہری پرجوش

14 اگست کی خوشی میں بازاروں میں رونقیں بڑھ گئی ہیں، بچےاور  بڑے سبھی قومی پرچم  اور بیجزکی خریداری میں مصروف نظر آ رہے ہیں، پاکستان کے مختلف شہروں میں خصوصی تقریبات کا بھی اہتمام کیا جارہا ہے۔

پنجاب اسمبلی  ، گورنر ہاؤس  اور  وزیر اعلی ہاؤس   کوبھی  رنگ برنگے برقی قمقموں سے روشن کیا گیا ہے۔

وفاقی دارالحکومت میں شاہراہ دستور اور جناح ایونیو سمیت کئی اہم سڑکوں کی دونوں طرف بھی روشنیوں کی بہار ہے۔

دوسری جانب 14 اگست کے موقع پر لاہور  میں  بھی سرکاری و  نیم سرکاری اور نجی عمارتوں کو خوبصورت رنگوں اور برقی قمقموں سے سجا دیا گیا ہے۔

چھوٹے بچوں کے لیے  جشن آزادی کی مطابقت  سے لباس اور نوجوانوں کیلئے ٹی شرٹس کی خریداری  بھی  سٹالز سےکی جا  رہی ہے، ہر طرف سبز ہلالی پرچموں کی بہار آ چکی ہے، دکانوں، گھروں اور گاڑیوں پر قومی پرچم لہرا رہے ہیں جبکہ نوجوانوں نے اپنی اپنی موٹر سائیکلوں اور کاروں کو بھی قومی پرچم سے سجایا ہوا ہے۔

ہر شخص جشن آزادی کو لے کر انتہائی پرجوش دکھائی دیتاہے اور چودہ اگست آزادی کی خوشیاں منانے کی تیاریاں مکمل کی جا رہی ہیں، مہنگائی کے باوجود شہریوں میں جشن آزادی منانے کے حوالے سے جوش و خروش میں کوئی کمی نظر نہیں آتی۔