اڈیالہ جیل میں عمران خان کے خلاف سائفر کیس کی سماعت

اسلام آباد: آفیشل سیکرٹ ایکٹ کے تحت پاکستان تحریک انصاف (پی ٹی آئی) کے چیئرمین عمران خان کے خلاف سائفر کیس کی سماعت آج (پیر) سے اڈیالہ جیل میں شروع ہوگئی۔

تفصیلات کے مطابق اڈیالہ جیل میں سائفر کیس کی سماعت جج ابوالحسنات ذوالقرنین کررہے ہیں۔

اسپیشل پراسیکیوٹر ذوالفقار نقوی، وکیل سلمان صفدر، فیڈرل انویسٹی گیشن ایجنسی (ایف آئی اے) کی ٹیم، تفتیشی افسر بھی سائفر کیس کی کارروائی کے لیے چالان کی کاپی کے ساتھ عدالت میں موجود ہیں۔

سابق وفاقی وزیر شاہ محمود قریشی کی صاحبزادی اور بیٹا زین قریشی بھی سماعت کے لیے اڈیالہ جیل پہنچ گئے ہیں۔

سابق وزیر اعظم عمران خان اور سابق وزیر خارجہ شاہ محمود قریشی کو آج اڈیالہ جیل میں قائم کمرہ عدالت میں پیش کیا جائے گا۔

عدالت نے چالان کی نقول فراہم کرنے کے لیے آج سماعت مقرر کی ہے۔

چیئرمین پی ٹی آئی کے خلاف کیس کی سماعت کے لیے پی ٹی آئی کے وکلا کی محدود تعداد کو اڈیالہ جیل میں داخل ہونے کی اجازت دے دی گئی ہے۔