نگران وزیر منصوبہ بندی سے پاکستان میں چین کے سفیر جیانگ زیڈونگ کی ملاقات

نگران وفاقی وزیر منصوبہ بندی سمیع سعید نے کہاہےکہ نگران حکومت سی پیک کے تحت جاری منصوبوں کو تیزی سے مکمل کرنے کےلیے پرعزم ہے اور سی پیک کے تحت خصوصی اقتصادی زونز پر کام تیزی سے جاری ہے۔

نگران وزیر منصوبہ بندی سے پاکستان میں چین کے سفیر جیانگ زیڈونگ نے ملاقات کی۔ اس موقع پر سیکرٹری وزارت منصوبہ بندی اویس منظور سمرا بھی موجود تھے۔ نگران وزیر منصوبہ بندی نے چین کے سفیر کو منصب سنبھالنے پر مبارکباد دی جنہوں نے گزشتہ ماہ اپنا منصب سنبھالا تھا۔

ملاقات میں سی پیک کے تحت جاری منصوبوں بالخصوص توانائی، انفراسٹرکچر، انٹرسٹریل زونز، ایگریکلچرل اور انفارمیشن ٹیکنالوجی اور دیگر پر تبادلہ خیال کیاگیا۔ اس موقع پرسمیع سعید نے کہا کہ نگران حکومت سی پیک کے تحت جاری منصوبوں کو تیز ی سے مکمل کرنے کےلیے پرعزم ہے۔ وزارت منصوبہ بندی باقاعدگی سے اقتصادی راہداری کے تحت جاری منصوبوں پر پیشرفت کا جائزہ لیتی ہے۔

سی پیک کے تحت اسپیشل اکنامک زونز کا کام تیزی سے جاری ہے۔ انہوں نے کہاکہ سی پیک کے تحت جاری منصوبوں پر کام کرنے والے عملے کی سکیورٹی کو مزید بہتر کرنے کے لیے حکومت پاکستان بھرپور اقدامات اٹھا رہی ہے۔چینی سفیر نے وزارت منصوبہ بندی کی کاوشوں کو خراج تحسین پیش کیا۔

انہوں نے کہا کہ وزارت منصوبہ بندی سی پیک کے تحت جاری منصوبوں پر اپنا بھرپور کردار ادا کر رہی جس کو چین قدر کی نگاہ سے دیکھتا ہے۔ بی آر آئی فورم انتہائی اہم فورم ہے جس میں پاکستان کی نمائندگی انتہائی اہمیت کی حامل ہے۔ چینی سفیر نے نگران وزیر منصوبہ بندی کو بی آر آئی فورم 2023 میں شرکت کی دعوت دی۔ بی آر آئی فورم 17 ، 18 اکتوبر 2023 کو بیجنگ میں منعقد ہو گا۔