اسرائیلی مسلح افواج کے لیے گولہ بارود سے بھرا پہلا امریکی طیارہ اسرائیل پہنچ گیا

اسرائیلی مسلح افواج کے لیے گولہ بارود سے بھرا پہلا امریکی طیارہ اسرائیل پہنچ گیا۔

اسرائیلی ڈیفنس فورسز کی پریس سروس کے مطابق یہ طیارہ نیواتیم ایئربیس پر اترا،یہ جدید گولہ و بارود سے لدا ہوا ہے ۔ اسرائیلی فوج نے اس حمایت پر امریکا کا شکریہ ادا کیا۔ انہوں نے کہا کہ ہمارے مشترکہ دشمن جانتے ہیں کہ ہماری افواج کے درمیان تعاون اتنا مضبوط ہے جتنا کبھی نہیں اور یہ علاقائی سلامتی اور استحکام کا کلیدی عنصر ہے۔

تازہ ترین اطلاعات کے مطابق7 اکتوبر سے جاری جھڑپوں اور گولہ باری کے نتیجے میں تقریباً 900 فلسطینی ہلاک اور 4500 سے زیادہ زخمی جبکہ 1000 سے زیادہ اسرائیلی ہلاک اور 3400 سے زیادہ زخمی ہوئے ہیں۔ حماس کا کہنا ہے کہ اس کا حملہ یروشلم میں مسجد اقصیٰ کے خلاف اسرائیلی حکام کی کارروائیوں کے جواب میں کیا گیا ہے۔

دوسری جانب اسرائیل نے جنگ کے لیے تیار رہنے اور غزہ کی پٹی کی مکمل ناکہ بندی کا اعلان کیا ہے۔ مغربی کنارے میں بھی جھڑپیں شروع ہوچکی ہیں اور لبنان کے ساتھ سرحد پر فریقین میں توپ خانے سے فائرنگ کا تبادلہ ہوا ہے۔