چیئرمین پی ٹی آئی کو پیش کرنے کےلیے الیکشن کمیشن نے پروڈکشن آرڈر جاری کرنے کا فیصلہ

چیئرمین پی ٹی آئی کو پیش کرنے کےلیے الیکشن کمیشن نے پروڈکشن آرڈر جاری کرنے کا فیصلہ کرلیا۔

چیئرمین پی ٹی آئی پر فرد جرم عائد کرنے کے لیے الیکشن کمیشن اور چیف الیکشن کمشنر کی توہین کے کیس کی سماعت ہوئی، سماعت کے دوران عمران خان کے وکیل شعیب شاہین سے پروڈکشن آرڈر کی استدعا کی۔

چیئرمین پی ٹی آئی کے وکیل شعیب شاہین نے کہا کہ عمران خان جیل میں ہیں، سیکورٹی کے بہانے باقی عدالتوں میں چیئرمین پی ٹی آئی کو پیش نہیں کیا جارہا، پروڈکشن آرڈر جاری کریں تاکہ چیئرمین پی ٹی آئی یہاں پیش ہوں۔

ممبر سندھ نثار درانی نے کہا کہ چیئرمین پی ٹی آئی تو پہلے یہاں آتے نہیں تھے اب پروڈکشن آرڈر کا کہہ رہے ہیں، آپ شوکاز نوٹس کا جواب جمع کرائیں، پروڈکشن آرڈر ہم جاری کر دیتے ہیں اور سیکیورٹی کیلئے آئی جی جیل خانہ جات کو لکھ دیتے ہیں۔

ممبر کے پی کے اکرام اللہ نے کہا کہ آپ یہ تو نہیں چاہتے کہ ہم چیئرمین پی ٹی آئی کے پاس چلے جائیں۔

میڈیا سے گفتگو کرتے ہوئے شعیب شاہین نے کہا کہ الیکشن کمیشن نے عمران خان کو 24 اکتوبر کو پیش کرنے کا حکم کر دیا ہے اور سکیورٹی کےلئے آئی جی پنجاب اور آئی جی اسلام آباد کو بھی ہدایات جاری کر دی ہیں اور جیل سپرنٹنڈنٹ کو بھی انہیں پیش کرنے کا حکم دے دیا ہے۔

ممبر بلوچستان شاہ محمد جتوئی نے کہا کہ ہم فرد جرم عائد کردیں گے۔ کمیشن نے کیس کی سماعت 24 اکتوبر تک ملتوی کردی۔