اسرائیلی بمباری سے غزہ میں 3لاکھ سے زائد افراد بے گھر، اقوام متحدہ

اقوام متحدہ نے کہا ہے کہ غزہ میں اسرائیلی بمباری کے باعث 3لاکھ 38ہزار سے زائد افراد بے گھر ہوگئے ہیں۔

غیر ملکی خبر رساں ایجنسی کے مطابق اقوام متحدہ کے دفتر برائے انسانی امور کے رابطہ کار(او سی ایچ اے)نے کہا کہ غزہ میں بڑے پیمانے پر نقل مکانی جاری ہے، بے گھر افراد کی تعداد بڑھ کر 3لاکھ 38ہزار 934 ہو گئی ہے۔

او سی ایچ اے نے کہا کہ تقریباً 2لاکھ 20ہزار افراد یا بے گھر ہونے والے دو تہائی فلسطینی شہریوں نے اقوام متحدہ کی فلسطینی پناہ گزینوں کی حمایت کرنے والی ایجنسی یو این آر ڈبلیو اےکے زیر انتظام سکولوں میں پناہ حاصل کی ہے، 15ہزار افراد فلسطینی اتھارٹی کے زیر انتظام سکولوں جبکہ ایک لاکھ سے زائد فلسطینی شہری اپنے عزیزواقارب ، پڑوسیوں، چرچ اور دیگر مقامات میں پناہ لے رہے ہیں۔

او سی ایچ اےنے غزہ کی وزارت تعمیرات عامہ اور ہاؤسنگ کے اعداد و شمار کا حوالہ دیتے ہوئے کہا کہ اسرائیلی بمباری نے غزہ میں 2,540 مکانات کو تباہ یا ناقابل رہائش بنا دیا ہے ۔ ادارے نے کہا کہ فضائی حملوں میں سیوریج سہولیات بھی متاثر ہوئی ہیں جس سے صحت کو خطرہ لاحق ہے۔