انتخابات میں کسی قسم کی تاخیر نہیں ہو گی ،نگران وزیر اعظم

نگران وزیراعظم انوارالحق کاکڑ نے آئندہ عام انتخابات کے انعقاد میں کسی ممکنہ تاخیر کو مسترد کردیاہے۔ایک نجی ٹیلی ویژن چینل کو دیئے گئے انٹرویو میں انہوں نے کہاکہ انتخابات کی تاریخ کا مقررہ وقت پر اعلان کیاجائے گا اورانتخابات کے انعقاد میں کسی تاخیرکاامکان نہیں۔

آزادانہ اورغیرجانبدارانہ انتخابات کے انعقاد کے حکومتی عزم کااعادہ کرتے ہوئے وزیراعظم نے کہاکہ تمام رجسٹرڈ جماعتوں کو انتخابی مہم کے دوران لوگوں کو متحرک کرنے اورعوامی حمایت کے حصول کاقانونی اورآئینی حق حاصل ہے۔تاہم انہوں نے کہاکہ اگرکسی کی سیاسی عمل میں شمولیت پر کوئی قانونی پابندی عائد کی گئی تو حکومت ذمہ دارنہیں ہوگی۔

نگران حکومت کے پاکستان مسلم لیگ نون کی طرف جھکائو کے الزامات مسترد کرتے ہوئے انہوں نے کہاکہ سیاسی جماعتیں عوامی حمایت حاصل کرنے کے لئے انتخابات سے پہلے عموماً ایسے تاثرات کااظہارکرتی ہیں۔

ایک سوال کے جواب میں وزیراعظم نے کہاکہ وہ فوجی قیادت کے ساتھ مطمئن ہیں اورنگران حکومت کو حتمی فیصلے کااختیارحاصل ہے۔