نگران وزیر اعظم چینی صدر کی دعوت پر چین کا دورہ کریں گے

نگران وزیراعظم انوار الحق کاکڑچین کے صدر شی جن پنگ کی دعوت پر چین کا دورہ کریںگے جہاں وہ رواں ماہ کی سترہ تاریخ کو شروع ہونے والے بین الاقوامی تعاون سے متعلق تیسرے بیلٹ اینڈ روڈ فورم میں شرکت کریںگے۔

وزیراعظم چین کے صف اول کے صنعت کاروں سے ملاقاتیں کریںگے تاکہ دوطرفہ تجارت اور سرمایہ کاری کو وسعت دی جاسکے۔ وہ ارومچی بھی جائیں گے اور مقامی رہنماؤں اور تاجروں سے ملاقاتیں کریں گے تاکہ تجارت، سرمایہ کاری اور عوامی رابطوں کو فروغ دیا جاسکے۔

وزیراعظم اپنی ملاقاتوں کے دوران چین پاکستان اقتصادی راہداری میں اہم کامیابیوں اور مستقبل کی ترجیحات پر روشنی ڈالیں گے اور اس کی اعلیٰ معیار کی ترقی کے پختہ عزم کا اعادہ کریں گے۔

دفتر خارجہ کی ترجمان کے مطابق وزیراعظم بیلٹ اینڈ روڈ فورم کی افتتاحی تقریب میں شرکت کریںگے۔

وزیراعظم ، صدر شی جن پنگ اور چین کی اعلیٰ قیادت کے علاوہ بیلٹ اینڈ روڈ فورم میں شریک دوسرے رہنماؤں سے دوطرفہ ملاقات کریں گے۔

یاد رہے کہ یہ دورہ چین پاکستان اقتصادی راہداری منصوبے کی دس سالہ تقریبات کے موقع پر ہو رہا ہے جو بیلٹ اینڈ روڈ اقدام کا اولین منصوبہ ہے۔