اسرائیل کے غزہ پر حملے تاحال جاری ،بچوں سمیت 1537 افراد شہید

اسرائیل نے غزہ پر ساتویں روز بھی حملے جاری رکھے جہاں بچوں سمیت ایک ہزار پانچ سو سینتیس سے زیادہ فلسطینی شہید اور چھ ہزار چھ سو بارہ زخمی ہوگئے ہیں اور غزہ میں انسانی بحران میں اضافہ ہورہا ہے ۔

حماس کے عسکری ونگ القسام بریگیڈز نے آج ایک اخباری بیان میں کہا ہے کہ گزشتہ چوبیس گھنٹے کے دوران غزہ پراسرائیل کے فضائی حملوں میں حماس کی طرف سے یرغمال بنائے گئے کم ازکم تیرہ اسرائیلی باشندے ہلاک ہوگئے ہیں۔

غزہ میں دو لاکھ سے زیادہ افراد نے فلسطینیوں کیلئے اقوام متحدہ کے امدادی ادارے کے تحت چلنے والے پناہ گزین سکولوں میں پناہ لے رکھی ہے ' تقریباً پانچ لاکھ افراد کی خوراک تک رسائی ختم ہوگئی ہے ۔

دوسری جانب غزہ میں فلسطینی جنگجوئوں نے اسرائیلی آبادیوں پرراکٹ برسانا جاری رکھے۔حماس کے راکٹ حملوں میں ہفتے کے روز سے آج تک ایک ہزار تین سو اسرائیلی ہلاک اور تقریباً تین ہزار دو سو زخمی ہوچکے ہیں۔

فلسطین کے صحت کے حکام نے کہا ہے کہ غزہ پر فضائی حملوں کے نتیجے میں ہرچند منٹ کے بعد دھماکے ہورہے ہیں۔