تمام امت مسلمہ مظلوم فلسطینیوں کے ساتھ کھڑی ہے ،طاہر محمود اشرفی

پاکستان علما کونسل کی اپیل پر ملک بھر میں جمعہ کے روز یوم یکجہتی فلسطین منایا گیا، مساجد میں خطبات جمعہ میں مظلوم فلسطینیوں کے ساتھ اظہار یکجہتی کیا گیا اور خصوصی دعائیں کروائی گئیں۔چیئرمین پاکستان علما کونسل حافظ محمد طاہر محمود اشرفی نے فلسطین کے ساتھ یکجہتی کا اظہار کرتے ہوئے کہا کہ امت مسلمہ مظلوم فلسطینی عوام کے ساتھ ہے، مسلم حکمرانوں کو فوری طور پر اپنا کردار ادا کرنا ہو گا۔انہوں نے کہا کہ انسانی حقوق کی بات کرنے والے مظلوم فلسطینیوں کے قتل عام پر خاموش ہیں،نہتے فلسطینی کئی دہائیوں سے اسرائیلی جبر و استبداد اور ظلم و ستم کا شکار ہیں.

اسرائیل مسلمانوں کا قبلہ اول بیت المقدس سمیت فلسطینیوں کے علاقوں پر غاصبانہ قبضہ کر کے بیٹھا ہے،انسانی حقوق کی علمبردار تنظیموں کو فلسطین میں بہنے والا خون نظر نہیں آتا۔انہوں نے کہا کہ اللہ تعالی نے فلسطین کے حریت پسندوں کے ذریعے اسرائیل کا غرور خاک میں ملا دیا جس کے بعد سے اسرائیل بدلے کی آگ میں جھلس رہا ہے اور اس نے غزہ میں رواں صدی کی بدترین جارحیت شروع کررکھی ہے۔

اسرائیل کو جنگی قوانین کی کوئی پروا ہے اور نہ انسانی حقوق کا خیال ہے،سول آبادی،معصوم شہریوں، ہسپتالوں سکولوں ، ایمبولینسوں، امدادی کارکنوں کو بھی نہیں بخشا،سب اس کی دہشت کی آگ کی لپیٹ میں ہیں۔انہوں نے کہا کہ افسوس کی بات یہ ہے کہ امریکہ، بھارت ، برطانیہ اور دیگر مغربی ممالک اسرائیل کے انسانیت سوزی پر مبنی مظالم میں اس کے ساتھ کھڑے ہیں،انسانی حقوق کی علمبردار تنظیمیں خاموش ہیں،اس وقت غزہ میں کسی بڑے انسانی المیے کا اندیشہ ہے،اقوام عالم کو صورتحال پر فوری ایکشن لیتے ہوئے اسرائیل کو جارحیت سے روکنا ہوگا.