چائے کی درآمدات میں مالی سال کے پہلے چارماہ میں سالانہ بنیادوں پر27 فیصد اضافہ

اسلام آباد: چائے کی درآمدات میں جاری مالی سال کے پہلے چارماہ میں سالانہ بنیادوں پر27 فیصد کی نموریکارڈکی گئی ہے۔

پاکستان بیوروبرائے شماریات کی جانب سے اس حوالہ سے جاری کردہ اعدادوشمارکے مطابق مالی سال کے پہلے چارماہ میں چائے کی درآمدات پر244.23 ملین ڈالر کا زرمبادلہ صرف ہوا جو گزشتہ مالی سال کی اسی مدت کے مقابلہ میں 27 فیصد زیادہ ہے۔

گزشتہ مالی سال کی اسی مدت میں چائے کی درآمدات پر192.78 ملین ڈالر کا زرمبادلہ صرف ہوا تھا، اکتوبر میں چائے کی درآمدات کاحجم 60.17 ملین ڈالر ریکارڈ کیا گیا جو ستمبرمیں 58.11 ملین ڈالر اور گزشتہ سال اکتوبر میں 53.67 ملین ڈالر تھا، مالی سال 2023 میں چائے کی درآمدات پر 495.36 ملین ڈالر کا زرمبادلہ صرف ہوا تھا۔