جنگ بندی کے فوری بعد اسرائیل کی زمین، فضاء اور سمندر سے بمباری

اسرائیل اور حماس کے درمیان جاری 7 روزہ جنگ بندی ختم ہوتے ہی اسرائیلی فوج نے غزہ پر ایک بار پھر وحشیانہ حملے شروع کردیئے۔

اسرائیلی فوج نے حماس پر جنگ بندی کی خلاف ورزی کا الزام لگا کر ایک بار پھر غزہ پر فوجی آپریشن کا آغاز کردیا ہے، جس کے نتیجے میں اب تک کم از کم 109 فلسطینی شہید ہوچکے ہیں، جن میں بچے بھی شامل ہیں۔

اسرائیل اور حماس کے درمیان غزہ میں جنگ بندی کا آغاز 24 نومبر کو ہوا تھا جس میں 2 مرتبہ توسیع کی گئی، تاہم جنگی بندی ختم ہوتے ہی اسرائیلی فوج نے آج (جمعہ کی) صبح ایک بار پھر غزہ پر وحشیانہ بمباری شروع کردی، جس میں رہائشی علاقوں، پناہ گزین کیمپوں اور اسکول کو نشانہ بنایا گیا۔

عرب میڈیا کے مطابق ایک بار پھر شمالی غزہ میں دھماکے اور فائرنگ کی آوازیں سنی جارہی ہیں۔ فلسطینی وزارت داخلہ کا کہنا ہے کہ اسرائیلی طیاروں نے غزہ پر متعدد فضائی حملے کئے۔