اگر نواز شریف نے الیکشن آگے کروانے کی کوشش کی تو جدوجہد کر کے الیکشن کر وائیں گے ،بلاول بھٹو

تفصیلات کے مطابق گوجرانوالہ کے غلام حسین پارک میں ورکر کنونشن سے خطاب کرتے ہوئے چیئرمین پی پی پی بلاول بھٹو زرداری کا کہنا تھا کہ پنجاب میں پہلے ورکر کنوشن کا آغاز گوجرانوالہ سے کر رہے ہیں ، پیپلزپارٹی الیکشن سے نہیں ڈرتی اگر کسی وجہ سے میاں نواز شریف نے الیکشن کو آگے لیجانے کی کوشش کی تو میں عوام کے ساتھ ملکر جدوجہد کر کے الیکشن کروائیں گے، پاکستان پیپلز پا رٹی کے جیا لے دما دم مست قلندر کر کے میدان میں نکلیں، جیت تیر کی ہوگی۔

چیئرمین پی پی پی بلاول بھٹو زرداری نے کہا کہ معاشی مسائل کا حل بھٹو کے نظریئے میں ہے، پیپلزپارٹی کا مقابلہ کسی سیاسی جماعت سے نہیں ہے بلکہ پیپلزپارٹی کا مقابلہ غربت اور بیروزگاری سے ہے، جب بھی پیپلزپارٹی کی حکومت بنتی ہے لوگوں کو روزگار ملتا ہے۔

انہوں نے یہ بھی کہا کہ نوجوانوں اور عوام کو روزگار دینا ہمارا نعرہ نہیں تاریخ ہیں، نوجوان اپنے ہاتھوں میں ڈگریاں لیکر گھوم رہے ہیں لیکن انہیں روزگار نہیں مل رہا، نوجوان پی پی پی کو منتخب کریں ہماری ذمہ داری ہوگی ان کو روزگار فراہم کرنے کی۔

انہوں نے کہا کہ سپریم کورٹ کے شکر گزار ہیں کہ انہوں نے سالوں بعد بھٹو کیس سننے کا فیصلہ کیا اور اس کی سماعت شروع کی ۔