آسٹریلیا کا طلبا اور ہنر مند افراد کے لیے ویزا قوانین سخت کرنے کا فیصلہ

کینبرا: آسٹریلیا نے تارکین وطن کی بڑھتی تعداد کو روکنے کے لیےغیرملکی طلبا اور کم ہنرمند افراد کے لیے ویزا قوانین کو سخت کرنے کا فیصلہ کیا ہے۔

اردو نیوز کے مطابق آسٹریلوی حکام کا کہنا ہے کہ وہ اپنے ملک میں تعلیم کے لیے آنے والے بین الاقوامی طلبا اور کم ہنرمند افراد کے لیے ویزا کے قوانین کو سخت کریں گے۔نئی پالیسیوں کے تحت بین الاقوامی طلبا کو انگریزی ٹیسٹ میں اعلیٰ درجہ بندی حاصل کرنے کی ضرورت ہو گی اور طالب علم کی دوسری ویزا درخواست پر مزید جانچ پڑتال بھی کی جائے گی۔

وزیر داخلہ کلیئر اونیل نے کہا کہ ہماری حکمت عملی نقل مکانی کی تعداد کو معمول پر لائے گی، یہ صرف نمبروں کی حد تک نہیں ہے اس وقت ہمارا ملک ہجرت کا جو تجربہ کر رہا ہے یہ درحقیقت آسٹریلیا کے مستقبل کے بارے میں ہے۔انہوں نے کہا کہ نئی امیگریشن پالیسی اُن غیرملکی ہنرمندوں کو آسٹریلیا کی جانب زیادہ سے زیادہ راغب کرے گی جن کی آسڑیلیا کو بہت ضرورت ہے۔