اینٹی نارکوٹکس فورس کی منشیات سمگلنگ کے خلاف کارروائی ، بین الصوبائی گروہ گرفتار ، ایک میٹرک ٹن منشیات برآمد

راولپنڈی: اینٹی نارکوٹکس فورس نے منشیات سمگلنگ کے خلاف کارروائی کے دوران منشیات سمگلرز کے بین الصوبائی گروہ کو گرفتار کرکے ایک میٹرک ٹن منشیات برآمد کرلی ہے۔

این ایف ترجمان کے مطابق کوٹ مومن سے خواتین اورمرد ملزمان پر مشتمل گروہ سے کروڑوں روپے مالیت کی منشیات برآمدکی گئی ہے۔

اے این ایف نے کامیاب آپریشن میں 4 خواتین سمیت 9 منشیات سمگلر ز کو گرفتار کر لیا۔ بین الصوبائی سمگلر گینگ، خواتین کے ذریعے پنجاب کے شہروں میں منشیات کی سمگلنگ میں ملوث تھا۔ ترجمان نے بتایا کہ کارروائی کے دوران کروڑوں روپے مالیت کی ایک میٹرک ٹن منشیات برآمد کی گئی۔

خواتین اور مرد ملزمان، ایک خاندان کے بھیس میں کوٹ مومن میں کرائے کے مکان میں مقیم تھے۔ اے این ایف ٹیم نے کوٹ مومن کے قریب 3 گاڑیوں کو تلاشی کےلئے روکاتودورانِ تلاشی، گاڑیوں سے مجموعی طور پر 703 کلو گرام چرس برآمد ہوئی۔

دوران تفتیش ملزمان نے کوٹ مومن میں واقع مکان میں منشیات کی موجودگی کا انکشاف کیا۔ملزمان کی نشاندہی پر اے این ایف کی ٹیم نے مکان پر بروقت چھاپہ مارا۔ کارروائی کے نتیجے میں گھر سے 398 کلوگرام افیون برآمد کر کے 4 خواتین کو گرفتار کیا گیا۔

ملزمان خیبر پختونخوا سے منشیات سمگل کر کے مذکورہ مکان میں سٹور کرتے تھے۔ ملزمان منشیات کو پنجاب کے دیگر اضلاع میں سپلائی کرتے تھے۔