نگران وفاقی کابینہ نے پاکستان کی پہلی قومی خلا ئی پالیسی کی منظوری دے دی

نگران وفاقی کابینہ نے پاکستان کی پہلی قومی خلا ئی پالیسی کی منظوری دی ہے جس کے تحت بین الاقوامی کمپنیوں کو صارفین کومواصلات کی خدمات فراہم کرنے کی اجازت ہوگی۔

اسلام آباد میں اطلاعات ونشریات کے نگران وزیر مرتضی سولنگی نے وزیراعظم انوارالحق کاکڑ کے زیر صدارت وفاقی کابینہ کے اجلاس میں کہا کہ بین الاقوامی کمپنیوں کو صارفین کو مواصلات کی خدمات فراہم کرنے کی اجازت ہو گی ، مرتضی سولنگی نے کہاکہ بین الاقوامی کمپنیاں نچلے مدار میں مواصلاتی سیاروں کے ذریعے اپنی خدمات فراہم کریںگی ۔

انہوں نے کہاکہ اس پالیسی سے نہ صرف غیرملکی سرمایہ کاری راغب ہوگی بلکہ ان خدمات پر خرچ ہونے والا غیرملکی زرمبادلہ بھی محفوظ ہوگا ۔

وفاقی وزیر نے کہاکہ پالیسی سے پاکستان میں عالمی معیار کے مطابق خلا کے ریگولیٹری نظام کے قیام میں بھی مدد ملے گی انہوں نے کہا کہ سپارکو میں تحقیق وترقی کیلئے فنڈز بھی مختص کئے گئے ہیں ، مرتضیٰ سولنگی نے ادویات کی قیمتوں کے حوالے سے بتایا کہ وفاقی کابینہ نے اقتصادی رابطہ کمیٹی کی جانب سے ادویات کی قیمتوں میں اضافے کے فیصلے کو موخر کردیا۔انہوں نے کہاکہ کابینہ نے قیمتیں مقرر کرنے اور ضابطے کے پورے نظام کا جائزہ لینے کی ہدایت کی تاکہ اس مسئلے کا جامع اور پائیدار حل نکالا جاسکے۔وزیراطلاعات نے کہا کہ کابینہ نے ان افغان شہریوں کیلئے پروسیسنگ فیس آٹھ سو ڈالر سے کم کرکے چار سوڈالر کردی ہے جو کسی تیسرے ملک جارہے ہیں۔