تحریک طالبان پاکستان سے کوئی مذاکرات نہیں ہونگے ،دفتر خارجہ

پاکستان نے تحریک طالبان پاکستان کے ساتھ مذاکرات کی اطلاعات اور افواہوں کو مسترد کردیا ہے،  دفتر خارجہ کی ترجمان ممتاز زہرہ بلوچ نے  اسلام آباد میں ہفتہ وار نیوز بریفنگ کے دوران صحافیوں کے سوالوں کے جواب دیتے ہوئے کہا کہ ٹی ٹی پی کےساتھ مذاکرات بالکل نہیں ہورہے، ترجمان نےکہاکہ ہم نے عبوری افغان حکومت کا بیان دیکھا ہے جس میں کہا گیا ہے کہ وہ ڈیرہ اسماعیل خان میں منگل کو ہونے والی دہشت گرد حملے کی تحقیقات کرے گی۔

ترجما ن نے بھارتی سپریم کورٹ کے بھارت کے 2019 کے غیرقانونی اور یکطرفہ اقدام کی  توثیق کے حوالے سے کہا کہ بھارتی سپریم کورٹ کو بین الاقوامی طور پر متنازعہ قرار دیے گئے جموں و کشمیر کے حوالے سے فیصلے کا کوئی قانونی جواز حاصل نہیں ہے۔

 انہوں نےکہاکہ پاکستان جموں و کشمیر کے تنازعے کے منصفانہ اور پرامن حل کےلئے کشمیری بھائیوں اور بہنوں کی سیاسی اخلاقی اور سفارتی حمایت جاری رکھے گا۔

ترجمان نے غزہ میں انسانی بنیادوں پر فوری جنگ بندی کےلئے اقوام متحدہ کی جنرل اسمبلی کی جانب سے پیش کی گئی قرار داد کا خیر مقدم کیا۔

 انہوں نے کہا کہ اس سے جاری اسرائیلی مظالم پر بین الاقوامی رائے عامہ اور عوام کے بڑھتے ہوئے غصے کی عکاسی ہوتی ہے جن کے باعث اٹھار  ہ ہزار سے زائد فلسطینوں  کی جانیں ضائع ہوئی ہیں۔

 عالمی برادری اسرائیل کے جنگی جرائم اور فلسطینی عوام کےخلاف جاری انسانیت سوز مظالم کا خاتمہ کرے۔

 ترجمان دفتر خارجہ نے  اسرائیلی مظالم اور لبنان اورشام پر حملوں کی بھی مذمت کی اور کہا کہ یہ حملے ان ملکوں کی ریاستی خود مختاری کی خلاف ورزی ہیں۔