غزہ جنگ کے خاتمے کے لیے ہر ممکن کوشش کے لیے تیار ہیں، حماس رہنما

حماس کے رہنما اسامہ حمدان نے کہا ہے کہ حماس کسی بھی ایسے فلسطینی قومی ریفرنس کی تشکیل کے لیے کسی بھی کوشش میں حصہ لے گی جو ہمارے لوگوں کے حقوق بحال کرے۔ غزہ میں جنگ کے خاتمے کے لیے ہر ممکن کوشش کے لیے تیار ہیں۔ حماس غزہ میں فلسطینیوں کے مصائب کے خاتمے کے لیے اہم رابطے کر رہی ہے۔

اسامہ حمدان نے حماس کے اس دعوے کو دہرایا کہ وہ غزہ پر جنگ کے خاتمے تک کسی بھی قیدی کے تبادلے کے معاہدے پر بات چیت نہیں کرے گی۔ انہوں نے کہا اسرائیل اس اختیار سے چھٹکارا حاصل کرنا چاہتا ہے جس کے ساتھ اس نے اوسلو معاہدے پر دستخط کیے تھے۔ اسرائیل نے اقوام متحدہ کے ایسے سکولوں کو تباہ کیا ہے جو بے گھر افراد کے لیے پناہ گاہیں تھیں۔

غزہ پر جنگ کے 69 ویں دن فلسطینی وزارت صحت نے بتایا ہے کہ اب تک اسرائیلی جارحیت میں18 ہزار 787 فلسطینی شہید ہو چکے ہیں اور 50 ہزار 897 افراد زخمی ہیں۔ فلسطینی ٹیلی کمیونیکیشن کمپنی (Paltel) نے غزہ کی پٹی پر جاری اسرائیلی حملے کی وجہ سے مواصلاتی اور انٹرنیٹ خدمات مکمل طور پر بند کرنے کا اعلان کیا۔ فلسطینی ہلال احمر نے کہا کہ غزہ میں آپریشن روم اور وہاں کام کرنے والے اس کے تمام عملے سے رابطہ مکمل طور پر منقطع ہے۔