سپریم کورٹ میں عام انتخابات کیس آج ہی ہنگامی بنیادوں پر مقرر کیے جانےکا امکان

سپریم کورٹ میں عام انتخابات کیس آج ہی ہنگامی بنیادوں پر مقرر کیے جانےکا امکان ہے۔ اٹارنی جنرل منصور عثمان اعوان سپریم کورٹ پہنچ گئے ہیں۔

ذرائع کے مطابق الیکشن کمیشن کا لاہور ہائی کورٹ اور اسلام آباد ہائی کورٹ کے فیصلے چیلنج کئے جانے کا امکان ہے۔

اس سے قبل سپریم کورٹ آف پاکستان کے چیف جسٹس قاضی فائز عیسیٰ سے چیف الیکشن کمشنر سکندر سلطان راجہ نے ملاقات کی۔ ملاقات میں جسٹس سردار طارق مسعود اور جسٹس اعجازالاحسن بھی شریک ہوئے جبکہ اس موقع پر اٹارنی جنرل منصور عثمان اعوان بھی موجود تھے۔

ذرائع کا بتانا ہے کہ چیف الیکشن کمشنر چیف جسٹس کی دعوت پر سپریم کورٹ آئے اور انہوں نے ججز کو لاہور ہائیکورٹ کے حکم امتناع سے آگاہ کیا۔ چیف جسٹس پاکستان نے چیف الیکشن کمشنر سے ملاقات سے پہلے دو سینئر ججز سے بھی ملاقات کی۔

چیف جسٹس کی چیف الیکشن کمشنر سے ملاقات!!
عام انتخابات، سپریم کورٹ کا ہنگامی فیصلہ؟#SupremeCourt #ECP #BreakingNews #GNN pic.twitter.com/t2BGYhwh91

— GNN (@gnnhdofficial) December 15, 2023

چیف جسٹس قاضی فائز عیسیٰ نے لاہور ہائیکورٹ کے آرڈر سے متعلق سینئر ججز سے مشاورت کی، جس کے بعد اٹارنی جنرل اور چیف الیکشن کمشنر کو طلب کیا گیا۔ اگر عام انتخابات 8 فروری کو ہونے ہیں تو الیکشن کمیشن کو آج یا کل تک الیکشن شیڈول جاری کرنا ہوگا اور انتخابی شیڈول 54 دن کا ہوتا ہے۔ انتخابی شیڈول کے مطابق 17 دسمبر پہلا دن اور 8 فروری 54واں دن بنتا ہے۔

یاد رہے کہ الیکشن کمیشن نے 8 فروری 2024 کو ملک بھر میں عام انتخابات کروانے کا اعلان کر رکھا ہے تاہم چند روز قبل پاکستان تحریک انصاف کی جانب سے عام انتخابات کے لیے بیوروکریسی کی خدمات لینے کا الیکشن کمیشن کا فیصلہ لاہور ہائیکورٹ میں چیلنج کیا۔

واضح رہے کہ گزشتہ روز پاکستان تحریک انصاف کی درخواست پر لاہور ہائیکورٹ کے سنگل بینچ نے عام انتخابات بیوروکریسی سے کروانے کا الیکشن کمیشن کا نوٹیفکیشن معطل کرتے ہوئے درخواستوں پر لارجر بینچ تشکیل دینے کی سفارش کردی کی تھی، جس کے بعد آج لاہور ہائیکورٹ نے عام انتخابات کےلیے بیورورکریسی کی خدمات کے خلاف درخواست پر لارجر بینچ تشکیل دے دیا ہے۔

جسٹس علی باقر نجفی کی سربراہی میں لاہور ہائیکورٹ کا 5 رکنی لارجر بینچ 18 دسمبر کو درخواست پر سماعت کرے گا ۔