سابق گورنر پنجاب سردار لطیف کھوسہ کا تحریک انصاف میں شمولیت کا اعلان

بانی چیئرمین پی ٹی آئی کے وکیل اور سابق گورنر پنجاب سردار لطیف کھوسہ نے تحریک انصاف میں شمولیت کا اعلان کردیا۔

پریس کانفرنس کے دوران پی ٹی آئی میں شمولیت کا اعلان کرتے ہوئے لطیف کھوسہ نے کہا کہ میں پرامید ہوں نفرتوں کی سیاست ختم ہوگی۔  بانی پی ٹی آئی کی خواہش پر تحریک انصاف میں شمولیت اختیار کر رہا ہوں، صرف ملک اور جمہوریت کے مفاد میں یہ فیصلہ کیا ہے۔

آج میں تحریک انصاف میں شمولیت کا اعلان کرتا ہوں۔ لطیف کھوسہ pic.twitter.com/5p0YfiouMz

— PTI (@PTIofficial) December 17, 2023

سردارلطیف کھوسہ نے کہا کہ نفرتوں کو دفن کرکے نئے سفر کی دعوت دیتا ہوں۔ میں نے وکالت اور سیاست عبادت سمجھ کر کی ہے، آئین کے اندر ہر چیز کا حل موجود ہے۔ جب بھی آئین کی خلاف ورزی ہوئی ریاست کو نقصان پہنچا، ہم نے جب جب آئین سے انحراف کیا ریاست کو نقصان پہنچا۔

لطیف کھوسہ کا کہنا تھا کہ  توقع ہےعدلیہ انصاف کے ترازو کو تھام کر انصاف کرے گی۔پاکستان کے تمام ادارے ہمارے ہیں، فوج بھی ہماری ہے، آئین میں تمام اداروں کی حدودو قیود متعین ہیں، آئین میں درج ہے کہ فوج سرحدوں کی محافظ ہے اور عوام کے ٹیکسز سے ان کو تنخواہیں ملتی ہیں۔

سردار لطیف کھوسہ کا کہنا تھا سچ کی آواز شدت سے بلند کرنے کیلئے پی ٹی آئی میں شمولیت کا فیصلہ کیا ہے۔ججز کے فرائض میں ہے کہ وہ انصاف فراہم کریں، قانون پر عملداری، آئین کی پاسداری کرنے والا امر ہو جاتا ہے، توقع کرتے ہیں کہ آج عدلیہ برابر کا انصاف کرے گی، 25 کروڑ عوام آپ کی طرف دیکھ رہے ہیں۔

واضع رہے کہ قانونی اور سیاسی حلقوں میں ایک اہم شخصیت ہیں اور اس وقت ان کی شمولیت سے پی ٹی آئی اور اس کے امیج کو تقویت ملے گی۔ ان دنوں بہت سے لوگوں نے پی ٹی آئی چھوڑ دی اور ان مشکل وقتوں میں کھوسہ نے پی ٹی آئی میں شامل ہونے کا فیصلہ کیا۔