پی ٹی آئی کے سابق رہنما عثماں ڈار کا خواجہ آصف کو چیلنج

تحریک انصاف کے سابق رہنما عثمان ڈار نے کہاہے کہ میں اپنی ماں کیساتھ کھڑا ہوں،دیکھتا ہوں الیکشن میں کون میری ماں کیساتھ ظلم کرتا ہے، میری والدہ پی ٹی آئی کے ٹکٹ پر الیکشن لڑیں گی۔

سیالکوٹ میں اپنی والدہ کے ہمراہ عثمان ڈار نے میڈیا سے گفتگو کرتے ہوئے کہاکہ 9مئی کو میرے گھر پر حملہ ہوا،اس حملے کے پیچھے بھی خواجہ آصف تھا،خواجہ آصف کے ایما پر ڈی پی او حسن نے میرے گھر پر حملہ کیا،کل رات بھی سیالکوٹ کی پولیس  نے خواجہ آصف کے کہنے پر میرے گھر پر حملہ کیا۔ پولیس خواجہ آصف کےکہنے پر ریاستی دہشت گردی پر اتر آئی ہے۔

میری والدہ عمر عطا بندیال سے انصاف مانگتی رہیں لیکن انہیں انصاف نہیں ملا، چیف جسٹس قاضی فائز عیسیٰ صاحب آج آپ اس عہدے پر ہیں اور میری ماں آپ سے انصاف مانگ رہی ہیں، میں امید کرتا ہوں کہ آپ میری ماں، میرے گھر کی عورتوں کو انصاف دلائیں گے۔

عثمان ڈار کی اپنی والدہ کے ہمراہ پریس… pic.twitter.com/YVzqvMjl6U

— PTI (@PTIofficial) December 19, 2023

عثمان ڈار نے چیف الیکشن کمشنر  کو مخاطب کرتے ہوئے کہاکہ سیالکوٹ کی عوام آپ کی طرف دیکھ رہی ہے،ڈی پی او حسن کے ہوتے ہوئے سیالکوٹ میں کوئی فری اینڈ فیئر الیکشن نہیں ہو سکتا،8فروری کو خواجہ آصف کو جتوانے کیلئے الیکشن لوٹا جائے گا۔

عثمان ڈار نے کہاکہ میں چیف جسٹس  پاکستان سے اپیل کرتا ہوں کہ میری ماں بار بار عدالتوں سے انصاف مانگتی رہی ہے مگر میری ماں کو انصاف نہیں ملا،میں امید کرتا ہوں کہ آپ میری ماں اور میری گھر کی خواتین کو انصاف دلائیں گے۔ میں اپنی پوری فیملی کے ساتھ جیل جانے کو تیار ہوں۔

عثمان ڈار نے چیلنج دیتے ہوئے کہا کہ خواجہ آصف الیکشن کے میدان میں میری ماں کا مقابلہ کرو، میں اپنی ماں کیساتھ کھڑا ہوں اور دیکھتا ہوں الیکشن میں کون میری ماں کیساتھ ظلم کرتا ہے۔