گورنر اسٹیٹ بینک کی وزیراعظم سے ملاقات ، روشن ڈیجیٹل اکاؤنٹ بارے تبادلہ خیال

تفصیلات کے مطابق اسٹیٹ بنک کے گورنر رضا باقر نے آج اسلام آباد میں وزیر اعظم عمران خان سے ملاقات کی اور روشن ڈیجیٹل اکائونٹ کے بارے میں تفصیلی تبادلہ خیال کیا۔گورنراسٹیٹ بنک  نے کہاکہ وزیر اعظم کے سعودی عرب کے حالیہ دورے کے بعد سعودی عرب میں مقیم پاکستانیوں نے روشن ڈیجیٹل اکائونٹ میں گہری دلچسپی ظاہر کی ہے۔انہوں نے کہا کہ اس کے زر مبادلہ ذخائر پر مثبت اثرات مرتب ہو رہے ہیں۔

خیال رہے کہ وزیر اعظم عمران خان نے گذشتہ برس ستمبر کے مہینے میں اس سکیم کا افتتاح کیا تھا جس کے تحت بیرون ملک پاکستانیوں کے سرمائے کو ملک میں لانے کے لیے مراعات کا اعلان کیا گیا تھا۔

اسٹیٹ بینک آف پاکستان کے مطابق روشن ڈیجیٹل اکاؤنٹ سکیم سمندر پار پاکستانیوں کے لیے ہے۔ اس اکاؤنٹ کے ذریعے  بیرون ملک مقیم پاکستانی ، پاکستان کے بینکاری اور ادائیگیوں کے نظام سے مکمل طور پر منسلک ہو جائیں گے۔ملکی تاریخ میں پہلی بار سمندر پار مقیم پاکستانی، پاکستان میں یا کسی سفارتخانے اور قونصلیٹ میں موجودگی کی شرط کے بغیر اپنا اکاؤنٹ کھول سکیں گے اور اس اکاؤنٹ کے ذریعے انھیں ملک میں بینکاری خدمات اور پرکشش سرمایہ کاری کے بھرپور مواقع تک رسائی حاصل ہو جائے گی۔