وزیراعظم اور چینی وزیراعظم کا دوطرفہ تعلقات مزید مستحکم بنانے کےعزم کااعادہ

تفصیلات کے مطابق پاکستان اور چین کے درمیان سفارتی تعلقات کے قیام کے 70برس پورے ہونے کے موقع پر ٹیلی فون پر بات چیت  کی،دونوں رہنماؤں نے دو طرفہ تعلقات کو وسعت دینے کے عزم کا اعادہ   کیا۔ اس دوران وزیراعظم عمران خان کا کہنا تھا کہ سال 2021ء پاک چین تعلقات کی 70 ویں سالگرہ کا خصوصی موقع ہے۔ ‎اس موقع پر پاک  چین سفارتی،دوطرفہ تعلقات اورویکسین کے تعاون پرتبادلہ خیال کیا گیا ۔

  اعلامیہ کے مطابق وزیراعظم عمران خان کی جانب سے  کورونا وائرس سے نمٹنے کے لیے پاک چین تعاون پر روشنی ڈالی گئی، وزیراعظم عمران خان نے کورونا ویکسین کی فراہمی میں تعاون پر چین کی تعریف کی ۔  وزیراعظم  کا کہنا تھا کہ این آئی ایچ میں ویکسین کی تیاری کورونا سے نمٹنے کے لیے پاکستانی کوششوں کومستحکم کرے گی۔  وزیراعظم عمران خان کی جانب سے قومی ادارہ صحت میں عالمی وبا کورونا ویکسین کی تیاری میں سہولت فراہم کرنے پر چین کا شکریہ ادا کیا گیا ہے۔

 وزیراعظم عمران خان  نے  چین پاکستان اقتصادی راہداری ( سی پیک) سے متعلق کہاکہ چین پاکستان اقتصادی راہداری منصوبہ ایک پٹی ایک شاہراہ کے اقدام کا اہم منصوبہ ہے جس سے معاشی سرگرمیوں اور روز گار کے مواقع پیدا ہوئے ہیں جبکہ دوطرفہ اور علاقائی تجارت کو مزید فروغ ملے گا۔

وزیر اعظم نے مریخ پر چین کے خلائی جہاز کے کامیابی سے اترنے پر بھی چینی قیادت کو مبارکباد دیتے ہوئے کہا کہ یہ چین کی ٹیکنالوجی کے شعبے میں بڑھتی ہوئی دسترس کا مظہر ہے۔  دونوں وزرائے اعظم نے پاک چین دوطرفہ تعلقات کو مزید مستحکم بنانے کے عزم کا ‏اظہار کیا ہے ۔