ایل این جی کی درآمد میں پہلے 5 ماہ کے دوران سالانہ بنیاد پر 7فیصد کمی ہوئی،ادارہ شماریات

اسلام آباد: ایل این جی کی درآمدات میں جاری مالی سال کے پہلے 5 ماہ کے دوران سالانہ بنیاد پر 7فیصد کمی ریکارڈکی گئی۔

پاکستان بیورو برائے شماریات کے مطابق جولائی سے نومبر تک ایل این جی کی درآمد پر 1.456 ارب ڈالر زرمبادلہ خرچ ہواجوگزشتہ مالی سال کی اسی مدت کے مقابلے میں 7 فیصد کم ہے، گزشتہ مالی سال کی اسی مدت میں ایل این جی کی درآمد پر 1.585 ارب ڈالر زرمبالہ خرچ ہوا تھا۔

نومبر 2023 میں ایل این جی کی درآمدات کا حجم 290 ملین ڈالر ریکارڈکیا گیا جو گزشتہ سال نومبرکے مقابلے میں 9 فیصد کم ہے، نومبر 2022 میں ایل این جی کی درآمدات پر 318 ملین ڈالر کا زرمبادلہ خرچ ہوا تھا۔ اکتوبر کے مقابلے میں نومبر میں ایل این جی کی درآمدات میں ماہانہ بنیاد پر 4 فیصد اضافہ ہوا، اکتوبر میں 278 ملین ڈالر مالیت کی ایل این جی درآمد کی گئی جو نومبرمیں بڑھ کر 290 ملین ڈالر ہو گئی۔