پاکستان اور چین دوطرفہ تعلقات مزید مضبوط بنانے کیلئے پرعزم

تفصیلات کے مطا بق صدرڈاکٹرعارف علوی اورچین کے صدر شی چن پنگ نے اس عزم کااظہارکیاہے کہ دوطرفہ تعلقات کومزیدمضبوط بنایاجائے گا اورچین پاکستان اقتصادی راہداری کے ذریعے اعلیٰ معیارکی ترقی حاصل کی جائے گی۔اس عزم کااظہاردونوں رہنمائوں نے دونوں ممالک کے سفارتی تعلقات کی 70ویں سالگرہ کے موقع پرمبارکباد کے خطوط کے تبادلے کے دوران کیا۔

صدرمملکت ڈاکٹرعارف علوی نے کہاکہ دونوں ملک اچھے اوربرے وقت کے دوست ہیں انہوں نے کہاکہ مشکلات کے باوجوددونوں ممالک نے اپنے مقاصد کے حصول کے لئے بھاری قربانیاں دی ہیں انہوں نے کہاکہ پاک چین لازوال  دوستی خطے میں  امن و استحکام کی ضامن ہے، صدر شی جن پنگ کی قیادت میں پاک چین دوستی مزید مضبوط ہوئی۔

اپنے خط میں چینی صدر شی چن پنگ نے کہاکہ دونوں ممالک کے مابین ستر سالہ دوستی اور اعتماد چٹان کی طرح مضبوط ہے،  چین اورپاکستان سدابہارتذویراتی شراکت دار ہیں ، دونوں بنیادی مفادات اورسنجیدہ نوعیت کے مسائل پرایک دوسرے کے ساتھ مضبوط سے کھڑے رہے ہیں۔

پاک چین سفارتی تعلقات کے 70 سال مکمل ہونے وزیرِ اعظم عمران خان نے   اپنے پیغام میں  کہا ہے کہ ہمارے تعلقات مشترکہ اعتماد اور ایک دوسرے کو سمجھنے پر مبنی ہیں۔انہوں نے کہا کہ دونوں حکومتیں اس سال کو منانے کے لیے رابطے میں ہیں، تاکہ ہمارے عوام کو بھی ہمارے تعلقات کی گہرائی کا پتہ چل سکے۔