حکومت کا موقف ہے کہ انتخابات 8 فروری کو ہوں ،وزیر اطلاعات

انتخابات میں تاخیر کرنا نگران حکومت کا اختیار نہیں ہے۔نجی ٹی وی کے پروگرام میں گفتگو کرتے ہوئےوزیراطلاعات  مرتضیٰ سولنگی نے کہا کہ آئین کے آرٹیکل 218(3) کے تحت انتخابات کا انعقاد، انتخابات کی تاریخ دینا یا تبدیل کرنے کا اختیار صرف الیکشن کمیشن آف پاکستان کو حاصل ہے۔

وفاقی وزیراطلاعات  نے کہا کہ انتظامیہ سمیت کسی دوسرے ادارے کو یہ اختیار نہیں کہ وہ الیکشن کی تاریخ میں تبدیلی کرے۔

مرتضیٰ سولنگی نے کہا کہ نگران حکومت کا موقف ہے کہ انتخابات 8 فروری کو ہوں گے۔انہوں نے کہا کہ سینیٹ اجلاس میں قرارداد کے حوالے سے میرا موقف نگران حکومت کا موقف ہے۔

انہوں نے کہا کہ قرارداد میں بیان کردہ مسائل حقیقی ہیں۔ بلوچستان اور خیبر پختونخوا میں سیکورٹی کے مسائل موجود ہیں۔ سلامتی کے معاملات یا سرد موسم حقیقی مسائل ہیں۔ قرارداد پیش کرتے وقت ایوان بالا میں ماحول جذباتی تھا۔

وزیراطلاعات نے کہا کہ اگر یہ قرارداد سازش ہے تو اسے ناکام بنانے کی ذمہ داری بھی انہی لوگوں پر عائد ہوتی ہے جو شکایت کر رہے ہیں۔ ایوان میں حاضری کو یقینی بنانا اور کورم کی نشاندہی کرنا بھی انہی جماعتوں کا کا م ہے۔ وفاقی وزیر نے کہا کہ بانی چیئرمین پی ٹی آئی جس حالت میں ہیں، ان کے لئے ممکن نہیں کہ وہ ٹویٹ یا کوئی آرٹیکل لکھیں۔”دی اکانومسٹ“ کے ساتھ اس معاملہ کو اٹھایا جائے گا۔