جہانگیر ترین گروپ سے ہمارا کوئی تعلق نہیں :حمزہ شہباز

تفصیلات کے مطابق مسلم لیگ ن کے رہنما اور پنجاب اسمبلی میں  اپوزیشن لیڈر حمزہ شہباز شریف نے میڈیا سے گفتگو کرتے ہوئے کہا ہے کہ پا کستان میں سیاسی انتشار عروج پر ہے ، آج ہمیں بنیادی فیصلے کرنے ہیں پاکستان کو آگے جانا ہے ،  یا آپس میں لڑ لڑ کر اس قوم کو برباد کرنا ہے ، جس دورائے پر آج پاکستان ہے قومی لائحہ عمل تیار نہیں کیا جائے گا تو آنے والی نسلوں کے سامنے شرمندہ ہوں گے ۔ پاکستان بحثیت قوم چیلنج کا سامنا کر رہا ہے ہمیں قومی مسائل پر یک زبان ہو کر بولنا چاہیئے۔

انہوں نے کہا کہ ہم نے 3 سال انتقام کو برداشت کیا اور ذمے دار اپوزیشن کا کردار ادا کیا، پورے ملک میں معاشی مسائل کا سب اندازہ لگاسکتے ہیں ۔ حمزہ شہباز کاکہنا تھا کہ  سیاسی جوڑ توڑ کی باتیں پیچھے رہ گئی ہیں اب ہر شخص اپنے مسائل کا حل چاہتا ہےاورمسائل کا حل آزاد اور منصفانہ الیکشن میں ہے۔

حمزہ شہباز کا کہنا ہے کہ پنجاب اسمبلی میں فلسطین کے ایک نکاتی ایجنڈے پر بات کی، اسرائیلی بمباری سے معصوم فلسطینی بچوں سمیت سیکڑوں افراد شہید ہوئے۔اسرائیل کی جانب سے رمضان کے مقدس مہینے میں مسجدِ اقصیٰ پر دھاوا بولا گیا، یہ ظلم و ستم کی داستاں ہم نے یکم رمضان اور 27 رمضان کو بھی دیکھی ، عید پر کہا ں لوگ اپنے بچوں کیلئے نئے کپڑے خریدتے ہیں وہاں  فلسطینی ماؤں نے کفن خریدے ۔

پنجاب اسمبلی میں اپوزیشن لیڈر کا مزید کہنا ہے کہ جب فلسطین کا ذکر آتا ہے تو مقبوضہ کشمیر کا بھی ذکر آتا ہےاور ہم ان کیساتھ بھی اظہار یکجہتی کرتے ہیں ۔ اقوام عالم کو پیغام دینا چاہتے ہیں کہ جب بھی فلسطین اور کشمیر میں بربریت ہوگی ہم ان کے شانہ بشانہ ہوں گے۔ ان کا کہنا تھا کہ  اس معاملے پر جوائنٹ ایکشن فورس بنانے کیلئے ترک صدر طیب اردوان کی تجویز سے اتفاق کرتا ہوں۔