نواز شریف کی برطانوی سفیر جین میریٹ سے ملاقات

لاہور: پاکستان مسلم لیگ (ن) کے سپریمو اور تین بار کے سابق وزیراعظم نواز شریف سے برطانوی ہائی کمشنر جین میریٹ نے پیر کو لاہور میں ملاقات کی۔

ملاقات میں باہمی دلچسپی کے امور پر تبادلہ خیال کیا گیا ،ملاقات میں مسلم لیگ ن کے صدر شہباز شریف اور چیف آرگنائزر مریم نواز شریف بھی موجود تھیں۔

 برطانوی ہائی کمشنر جین میریٹ نے بھی مختلف سیاسی جماعتوں اور ان کے رہنماؤں سے ملاقاتوں کی تصدیق کی۔

نواز شریف نے پاکستان اور برطانیہ کے درمیان مضبوط تعلقات کی اہمیت کو اجاگر کرتے ہوئے  کہا کہ ایسے تعلقات دونوں ممالک کے بہترین مفاد میں ہیں۔ انہوں نے دونوں ممالک کے درمیان دوستی کو مضبوط بنانے میں برطانیہ میں پاکستانی شہریوں کے نمایاں کردار کا اعتراف کیا۔

انہوں نے پاکستان اور برطانیہ کے درمیان تجارت اور سرمایہ کاری سمیت مختلف شعبوں میں تعلقات کو فروغ دینے کی ضرورت پر بھی تبادلہ خیال کیا۔

برطانوی ہائی کمشنر جین میریٹ نے کہا کہ انہوں نے کراچی، لاہور اور اسلام آباد میں مختلف سیاسی جماعتوں سے ملاقاتیں کیں۔ انہوں نے 8 فروری کو ہونے والے آئندہ عام انتخابات پر تبادلہ خیال کرتے ہوئے ملک کے مستقبل کے لیے ان کی اہمیت پر زور دیا۔

 میریٹ نے نواز شریف کو مختلف قانونی فتوحات پر مبارکباد بھی دی۔