امریکہ سے تنازعہ بڑھ بھی جائے، رفح پر کنٹرول حاصل کرینگے، اسرائیل

اسرائیل نے واضح کیا ہے کہ امریکہ سے تنازعہ بڑھ بھی جائے، رفح پر کنٹرول حاصل کرینگے، گر امریکہ سمیت پوری دنیا اسرائیل کے خلاف ہو جائے ہم پھر بھی جنگ جیتنے تک لڑیں گے۔

رفح پر اسرائیلی ٹینکوں اور فورسز کے حملے کا امکان واشنگٹن میں تشویش بڑھا رہا ہے۔ پانچ ماہ سے جاری جنگ میں دیگر مقامات سے نقل مکانی کرکے دس لاکھ سے زیادہ فلسطینی رفح میں پناہ لیے ہوئے ہیں۔ ان پناہ گزینوں کو دوسرے محفوظ مقامات پر منتقل کرنے کے منصوبے کے بغیر رفح پر حملے سے بڑے جان نقصانات کے خدشات بڑھ رہے ہیں۔

اسرائیل کے اسٹریٹجک امور کے وزیر رون ڈرمر نے ایک انٹر ویو میں کہا ہے کہ ہمیں اس کو مؤثر طریقے سے نافذ کرنے کی اپنی صلاحیت پر کافی اعتماد ہے، نہ صرف فوجی نقطہ نظر سے بلکہ انسانی ہمدردی کے پہلو سے بھی ایسا کرنے کی ہماری صلاحیت پر ان کا اعتماد کم ہے۔

امریکہ میں سابق سفیر ڈرمر نے مزید کہا کہ اسرائیل رفح کے حوالے سے امریکی فریق کے خیالات کو سنے گا لیکن مصر کی سرحد پر واقع شہر رفح کو کنٹرول کیا جائے گا چاہے دونوں اتحادی کسی معاہدے پر پہنچیں یا نہیں۔ یہ ہو گا چاہے اسرائیل کو تنہا لڑنا پڑے ۔ اگر امریکہ سمیت پوری دنیا اسرائیل کے خلاف ہو جائے ہم پھر بھی جنگ جیتنے تک لڑیں گے۔ حماس کی 25 فیصد اصل جنگجو فورس اب رفح میں ہے۔

ڈرمر نے کہا ہے کہ حماس کو غزہ میں چھوڑنا پورے خطے سے اسرائیل پر لامتناہی حملوں کا باعث بنے گا۔ یہی وجہ ہے کہ ان کو ہٹانے کا عزم اتنا مضبوط ہے چاہے اس سے امریکہ کے ساتھ ممکنہ اختلافات پیدا ہوجائیں پھر بھی حماس کیخلاف کارروائی جاری رکھی جائے گی۔ رفح میں حماس کے چار بریگیڈز برقرار ہیں جن کی حمایت غزہ کے دوسرے حصوں سے انخلا کرنے والے جنگجو کر رہے ہیں۔ حماس کی یہ طاقت جنگ سے پہلے کی طاقت کے 25 فیصد کی نمائندگی کرتی ہے۔ ہم اس ایک چوتھائی طاقت کو ایک جگہ پر نہیں چھوڑیں گے۔ ہم رفح جائیں گے کیونکہ ہمیں وہاں جانا ہے۔