راولپنڈی ٹیسٹ: جنوبی افریقہ 201رنزبنا کر آؤٹ ،پاکستان کی بیٹنگ جاری

 تفصیلات کے مطابق جنوبی افریقہ کی ٹیم پہلی اننگز میں 201 رنز بنا کر آؤٹ ہوئی۔جس کے بعد اب پاکستان کی جنوبی افریقہ کیخلاف بیٹنگ جاری ہے ۔ دوسری اننگز میں پاکستان کی جنوبی افریقہ کے خلاف دوسری وکٹ 28 رنز پر گر گئی ہے اور  عابد علی 13 رنز بنا کر آؤٹ ہو گئے۔

تیسرے روز  جنوبی افریقہ نے 106 رنز 4 کھلاڑی آؤٹ سے اپنی پہلی نامکمل اننگز کا آغاز کیا، صرف 8 رنز کے اضافے کے بعد  جنوبی افریقہ  کو پہلی یعنی پانچویں وکٹ کا نقصان اٹھانا پڑا،  29 رنز پر کھیلتے کپتان کوآنٹن ڈی کوک کو شاہین آفریدی نے بولڈ کیا۔ جنوبی افریقہ کی چھٹی وکٹ 164 رنز پر گری جب مولڈر 33 رنز بنا کر رن آؤٹ ہوئے،  ساتویں آؤٹ ہونے والے کھلاڑی جارج لانڈی تھے وہ 21 رنز بنا سکے۔ڈین ایلگر 15، وان ڈیر ڈاسن کھاتہ کھولے بغیر بولڈ ہوگئے۔ فاف ڈپلسی 17 جبکہ ، ایڈن مارکرم 32 رنز بنا کر آؤٹ ہوئے۔

 قومی ٹیم کی جانب سے حسن علی نے 5، نعمان علی، فہیم اشرف اور شاہین آفریدی نے ایک ایک وکٹ حاصل کی۔

گزشتہ روزخراب روشنی کے باعث دوسرے دن کا کھیل مقررہ وقت سے 10 منٹ قبل ہی ختم کردیا گیا تھا، پاکستان نے اپنی پہلی اننگز میں 272 رنز اسکور کیے جس کے جواب میں جنوبی افریقہ کی ٹیم بیٹنگ کیلئے  میدان میں اتری ہے ۔

یاد رہے کہ پاکستان کو دو میچوں پر مشتمل ٹیسٹ سیریز میں ایک صفر کی برتری حاصل ہے۔ پہلے ٹیسٹ میچ میں پاکستان نے جنوبی افریقہ کو سات وکٹوں سے شکست دی تھی۔