9 مئی مقدمات: شاہ محمود قریشی کا 9 روزہ جسمانی ریمانڈ منظور

لاہور: انسداد دہشت گردی کی عدالت نے پاکستان تحریک انصاف (پی ٹی آئی) کے رہنما شاہ محمود قریشی کا 9 مئی کے 9 مقدمات میں 9 روزہ جسمانی ریمانڈ منظور کرلیا۔

انسداد دہشتگردی کی عدالت کے لاہور کے جج خالد ارشد نے محفوظ فیصلہ سنایا جس میں عدالت نے شاہ محمود قریشی کی تحقیقاتی رپورٹ 5 جون کو پیش کرنے کا حکم دیا۔

عدالتی فیصلے میں کہا گیا کہ شاہ محمود قریشی سے ویڈیو لنک کے ذریعے پوچھ گچھ کی جائے۔

فیصلے میں مزید کہا گیا کہ تفتیشی افسر کے مطابق ملزم نے سوشل میڈیا پر ویڈیوز اور پیغامات جاری کیے، سوشل میڈیا پر اپ لوڈ کیا گیا تمام مواد فرانزک لیب کو بھجوا دیا گیا ہے۔

یاد رہے کہ 26 مئی کو لاہور پولیس نے اڈیالہ جیل میں قید تحریک انصاف کے وائس چیئرمین شاہ محمود قریشی کی 9مئی کے مزید 9 مقدمات میں گرفتاری ڈال دی تھی۔