نواز شریف مسلم لیگ (ن) کی پارٹی صدارت سنبھالنے کو تیار

مسلم لیگ (ن) کی کی جنرل کونسل کا اجلاس آج شاہ 4 بجے ہو گا۔

مشیر وزیراعظم رانا ثناء اللہ کا کہنا ہے کہ پارٹی آئین کے مطابق الیکشن پراسس کا فیصلہ کیا گیا۔

رانا ثناء نے کہا کہ شاہد خاقان عباسی بھی کاغذات جمع کروا سکتے ہیں، اہلیت کا فیصلہ سکروٹنی کمیٹی کرے گی۔ نوازشریف کسی سے روٹھے نہیں ، پارٹی میں متحرک ہیں ، نواز شریف کے بیانات کی جو کمی محسوس ہو رہی ہےوہ آہستہ آہستہ ختم ہو جائے گی۔

انہوں نے کہا کہ بانی پی ٹی آئی کو محتاط رویہ اختیار کرنا چاہئے ۔ اللہ تعالیٰ نے بانی پی ٹی آئی کو شیخ مجیب جیسے انجام سے بچائے۔

رانا ثنااللہ کا کہنا تھا کہ پاکستان مسلم لیگ کو عوامی پارٹی بنانے والے ہی نوازشریف ہیں، قائداعظم محمد علی جناح کے بعد نواز شریف ہی تھے جنہوں نے پارٹی کو متحرک کیا۔

ذرائع کے مطابق ایک مقامی ہوٹل میں ہونے والے اجلاس میں ممکنہ طور پر نواز شریف کو بلامقابلہ منتخب کیا جائے گا، پارٹی کے 11 ارکان نے اعلیٰ نشست کے لیے کاغذات نامزدگی حاصل کرلیے ہیں۔

اس سے قبل پاکستان مسلم لیگ (ن) نے 11 مئی کو جنرل کونسل کا اجلاس بلانے کا اعلان کیا تھا لیکن پاکستان کے ایٹمی طاقت بننے کے 26 سال مکمل ہونے کے جشن کے موقع پر اسے ملتوی کر دیا گیا تھا۔